پارٹی اصولوں کی خلاف ورزی ، پی ٹی آئی نے اسلم ابڑو اور شہریار شرکو پارٹی سے نکال دیا

تفصیلات کے مطابق پی-ایس ون جیکب آباد-1 سے اسلم ابڑو اور پی-ایس-18/گھوٹکی-1 سے شہریار خان شر کو پارٹی سے نکالنے کا حکمنامہ جاری  کردیاگیا ۔سندھ سے تعلق رکھنے والی دونوں اراکین صوبائی اسمبلی کی بنیادی جماعتی رکنیت ختم کر دی گئی ، تحریک انصاف کی قائمہ کمیٹی برائے نظم و احتساب غربی سندھ، کراچی نے متفقہ فیصلہ جاری کردیا ۔

تحریک انصاف کی قائمہ کمیٹی برائے نظم و احتساب غربی سندھ کے فیصلے کے مطابق تحریک انصاف کی قیادت کو دونوں اراکین کیخلاف الیکشن کمیشن آف پاکستان سے رجوع کی بھی سفارش کی گئی ہے ۔ تحریک انصاف  حکم نامہ کے مطابق سینٹ انتخابات کے دوران اسلم ابڑو اور شہریار شر نے جماعتی احکامات سے روگردانی کی، دونوں اراکین سندھ اسمبلی کو اپنی صفائی پیش کرنے کا موقع دیا گیا،  واضح اور حتمی شواہد کی پڑتال اور ملزمان کی جانب سے صفائی پیش نہ کئے جانے پر معاملہ نمٹا رہے ہیں۔ تحریک انصاف سکیڈ میں کہا گیا ہے کہ   اسلم ابڑو اور شہریار شر کی بنیادی رکنیت ختم کرکے دونوں کو فوری جماعت سے نکالا جائے ،  الیکشن کمیشن سے رجوع کرکے دونوں اراکینِ سندھ اسمبلی سے اسمبلی رکنیت بھی واپس لی جائے، ملزمان قائمہ کمیٹی برائے نظم و احتساب غربی سندھ، کراچی کے اس فیصلے کیخلاف مرکزی سکیڈ کے روبرو 7 یوم میں اپیل دائر کرنے کے مجاز ہیں۔

اس سے قبل  پارٹی نظم و ضبط کی خلاف ورزی پر تحریک انصاف کے 2 اراکین سندھ اسمبلی کو نوٹس جاری کیے گئے تھے ۔

واضح رہے کہ پاکستان تحریکِ انصاف (پی ٹی آئی) کے منحرف رکنِ سندھ اسمبلی اسلم ابڑو ، شہریار شر نے سینیٹ الیکشن میں پیپلز پارٹی کو ووٹ دینے کا اعلان کیا تھا۔