سندھ میں 15 اپریل تک اسمارٹ لاک ڈاؤن نافذ

محکمہ داخلہ نے حکم نامہ جاری کردیا جس میں کہا گیا کہ اسمارٹ لاک ڈاؤن کے دوران تمام کاروباری مراکز رات 10 بجے بند کرناہوں گے ، ان ڈور شادی کی تقریبات پر پابندی ہوگی اور شادی ہالز میں کھانا کھلانے پر بھی پابندی عائد ہوگی ۔ اس کے علاوہ شادی کی دعوت میں 300 افراد بلائے جاسکیں گے۔

نوٹیفکیشن کے مطابق ہوٹل ہالز میں ان ڈورڈائننگ پر بھی پابندی عائد ہوگی اور آؤٹ ڈور ڈائننگ ،ٹیک اوے،ہوم ڈلیوری کی اجازت دی گئی ہے، نوٹیفکیشن کے مطابق دفاتر میں پچاس فیصد اسٹاف کو بلایا جائے اور گھر سے کام کو ترجیح دی جائےتاہم شہریوں کو ماسک پہننا لازمی ہوگا ۔ 

خیال رہے کہ پنجاب کے چھ اضلاع میں بھی اسمارٹ لاک ڈاؤن نافذ کردیا گیا ہے اور اسلام آباد میں دو ماہ کیلئے دفعہ144 نافذ کر دی گئی ہے۔صوبائی حکومت نے بڑھتے ہوئے کورونا کیسز کے سبب لاہور، راولپنڈی، گوجرانوالہ، ملتان، فیصل آباد اور سرگودھا میں دو ہفتوں کے لیے اسمارٹ لاک ڈاون نافذ کر دیا ہے۔

خیبرپختونخوا کے 7 اضلاع میں اسمارٹ لاک ڈاؤن کا فیصلہ کیا گیا ہے۔ 7 اضلاع میں کل 16 مارچ سے اسمارٹ لاک ڈاؤن نافذ کر دیا جائے گا۔ جن میں پشاور، مردان، نوشہرہ، ایبٹ آباد، سوات، صوابی اور مالاکنڈ شامل ہیں۔ ان علاقوں میں بازار رات 8 بجے بند کر دیے جائیں گے۔