بلوچستان میں سیکیورٹی فورسز کا آپریشن ’’رد الفتنہ ون‘‘ کامیابی سے مکمل، 216 دہشت گرد جہنم واصل

راولپنڈی:بلوچستان میں سیکیورٹی فورسز کا آپریشن رد الفتنہ ون کامیابی سے مکمل کر لیا گیا ،جس میں بھارتی حمایت یافتہ 216 دہشت گرد جہنم واصل کیے گئے۔

پاک فوج کے شعبہ تعلقات عامہ(آئی ایس پی آر) کے مطابق آپریشن کے دوران انٹیلی جنس بنیادوں پر مربوط اور تیز کارروائیاں کی گئیں،بھارت کی سرپرستی میں کام کرنے والے دہشت گرد عناصر کو نشانہ بنایا گیا جو خواتین اور بچوں سمیت شہریوں کو نشانہ بنا کر امن اور ترقی کو سبوتاژ کرنا چاہتے تھے۔

ترجمان آئی ایس پی آر نے بتایا کہ29 جنوری 2026 کو پنجگور اور ہرنائی کے نواح میں کارروائیاں مصدقہ خفیہ اطلاعات پر شروع کی گئیں،سیکیورٹی فورسز نے دہشت گردوں کے ٹھکانوں پر کارروائی کرتے ہوئے بھارتی پراکسی نیٹ ورکس سے وابستہ 41 دہشت گرد ہلاک کر دیے۔

آئی ایس پی آر کے مطابق محتاط منصوبہ بندی، قابلِ عمل انٹیلی جنس اور مربوط مشترکہ کارروائی کے ذریعے پاکستان کی سکیورٹی فورسز اور قانون نافذ کرنے والے اداروں نے انٹیلی جنس ایجنسیوں کی معاونت سے آپریشن ردالفتنہ-1 کے تحت نہایت درستی اور عزم کے ساتھ کارروائی کی، ان مربوط جھڑپوں اور بعد ازاں کلیئرنس آپریشنز کے نتیجے میں 216 دہشت گردوں کو ہلاک کر دیا گیا، جس سے دہشت گرد نیٹ ورکس کی قیادت، کمانڈ اینڈ کنٹرول ڈھانچے اور عملی صلاحیتوں کو شدید نقصان پہنچا۔

ترجمان پاک فوج کے مطابق آپریشن کے دوران دہشت گرد نیٹ ورکس کی قیادت، کمانڈ اینڈ کنٹرول اور آپریشنل صلاحیت کو شدید نقصان پہنچا،کارروائیوں میں غیر ملکی ساختہ اسلحہ، گولہ بارود، دھماکہ خیز مواد اور دیگر سازوسامان کی بڑی مقدار برآمد ہوئی۔

ترجمان نے مزید بتا یا کہ آپریشن کے دوران 36 معصوم شہری جن میں خواتین اور بچے شامل ہیں شہید ہوئے،22 جوانوں نے مادر وطن کے دفاع اور شہریوں کے تحفظ کے لیے جان کا نذرانہ پیش کیا۔

آئی ایس پی آر کے مطابق قوم شہداء کی قربانیوں کو خراج عقیدت پیش کرتی ہے اور ان کے اہل خانہ کے ساتھ کھڑی ہے ،دہشت گردی کے مکمل خاتمے تک انسداد دہشت گردی آپریشنز پوری قوت سے جاری رہیں گے،آپریشن ردالفتنہ ون بلوچستان اور پاکستان کے عوام کے امن، اتحاد اور ترقی کے عزم کی عکاسی کرتا ہے۔