چین اسلامی دنیا کے ساتھ مربوط تعاون کے لیے تیار ہے : چینی وزیرخارجہ

تفصیلات کے مطابق اسلامی تعاون تنظیم ( او آئی سی ) کے وزرائے خارجہ کا دو روزہ اجلاس اسلام آباد میں جاری ہے، چین کے وزیر خارجہ وانگ ژی  نے  تقریب سے خصوصی خطاب میں کہا کہ چین اقوام متحدہ میں اسلامی دنیا کی حمایت نہیں بھول سکتا، چین  دوستانہ تعلقات چین کی روایات کی بنیاد ہے، اجلاس کا مرکزی خیال "اشتراک برائے اتحاد، انصاف و ترقی" مشترکہ خواہشات کا عکاس ہے اور ہم علاقائی سلامتی و استحکام، ترقی،  کے لیے کام کرنے کے لیے تیار ہیں ۔ 

چینی وزیرخارجہ نے کہاکہ چین دو ریاستی حل کے لیے فلسطینی عوام کے ساتھ کھڑا ہے، فلسطینی مسلمانوں کے لیے چین کی حمایت ہمیشہ غیرمتزلزل رہی ہے ۔انہوں نے کہا کہ چین  افغانستان امن، ترقی اور تعمیر نو کی ہر ممکن مدد اور تعاون کے لیے ساتھ ہے،چین، یوکرائن اور روس کے مابین مذاکرات، پرامن انداز میں مسائل کے حل کا حامی ہے۔

وانگ ژی نے کہاکہ چین مسلم دنیا میں 600 منصوبوں پر 400 ارب ڈالر کی سرمایہ کاری کر رہا ہے،  چین نے 1.3 ارب ویکسین خوراکیں 50 ممالک کو فراہم کیں، چین اسلامی دنیا کو 30 کروڑ ویکسین خوراکیں فراہم کرے گا۔ ہمیں سلامتی اور استحکام میں اشتراک کے لیے آگے بڑھنا ہے۔

انہوں نے کہا کہ  54 مسلم ممالک نے ایک سڑک ایک راستہ منصوبے پر دستخط کیے ، چین تہذیبو‌ں کے مابین مذاکرات کا حامی ہے اور تہذیبو‌ں کے مابین مذاکرات اور تصادم سے بچنے کے لیے آگے بڑھنا ہو گا۔

واضح رہے کہ اسلامی تعاون تنظیم (او آئی سی) کے وزرائے خارجہ کی کونسل (سی ایف ایم) کا 48 واں اجلاس جاری ہے ، اجلاس میں 57  ممالک کے وزرائے خارجہ موجود ہیں، ان کے علاوہ صدر پاکستان ڈاکٹر عارف علوی، وزیراعظم عمران خان، وفاقی وزرا اور اہم شخصیات بھی اجلاس میں شریک ہیں۔