ٹوبہ ٹیک سنگھ میں دو مسافر بسوں میں تصادم ، 2افراد جاں بحق

تفصیلات کے مطابق افسوس ناک واقعہ ٹوبہ ٹیک سنگھ  میں پیش آیا جہا ں رجانہ انٹرچینج سے گزرنے والی دو بسیں  آپس میں ٹکرا گئیں ۔ حادثے  میں دو افراد موقع پر دم توڑ گئے جبکہ  20 کے زخمی ہونے کی اطلاعات ہیں ۔ حادثے کی اطلاع ملنے پر ریسکیو ٹیمیں اور پولیس موقع پر پہنچ گئیں اور زخمیوں اور لاشوں کو قریبی اسپتال منتقل کردیا۔ پولیس  کی جانب سے حادثے کی تحقیقات کی جارہی ہے ۔

واضح رہے کہ عالمی ادارہ صحت کے مطابق پاکستان میں سالانہ 35 ہزار لوگ سڑک حادثات میں جاں بحق ہوجاتے ہیں، جبکہ 50 ہزار سے زائد افراد زخمی اور عمر بھر کی معذوری سے دوچار ہوتے ہیں۔ حکومتی رپورٹ کے مطابق پاکستان میں ہر پانچ منٹ کے بعد ٹریفک حادثہ پیش آتا ہے، جس میں کوئی نہ کوئی شخص زخمی یا  جاں بحق ہوجاتا ہے۔