دوسروں کو چوہا کہنے والا عمران خان آٹا اور چینی کھانے والا چوہا ہے: مریم نواز

 پنجاب اسمبلی میں قائد حزب اختلاف حمزہ شہباز کے ہمراہ مشترکہ پریس کانفرنس سے خطاب کرتے ہوئے مریم نواز کا کہنا تھا کہ عمران خان ایک دن بھی جیل برداشت نہیں کرسکتا جب کہ ن لیگ کی پوری قیادت نے جیل کاٹی ہے، اپ نے منہ کھولا تو دوسرے دن جیل میں ہوں گے، عمران خان دیوار پھیلانگ کر بھاگنے والا انسان ہے۔

ان کا کہنا تھا کہ امربالمعروف جلسے کیلئے قومی وسائل کا استعمال کیا گیا، یہ آپ کے خاندان کی نہیں عوام کے خون پسینے کی کمائی ہے، مجھےانتظامیہ نے بتایا 200 بسیں لانے کا ٹاسک دیا گیا، اگر یہی پیسہ عوام کی صحت و تعلیم پرلگتا توعوام کو ریلیف ملتا، عوام گھی کا ڈبہ قسطوں پرلینے پرمجبور ہیں۔

مریم نواز کا کہنا تھا کہ تحریک انصاف کے جلسے میں مذہب کا نام استعمال کیا جا رہا ہے،یہ کیا طریقہ ہے کہ جلسے کا نام امربالمعروف رکھ  دیا گیا؟ انہوں نے استفسار کیا کہ عوام سے بجلی، آٹا اور چینی چھین لینا امربالمعروف ہے؟ آپ فضل الرحمان کو باربارڈیزل کہہ کرپکارتے ہیں۔

مریم نواز کا کہنا تھا کہ گوجرانوالہ کے عوام کا شکریہ ادا کرنا چاہتی ہوں، گوجرانوالہ میں لوگ رات 2 بجے تک انتظار میں تھے، گزشتہ 75 سال میں عوام نے اتنا فساد نہیں دیکھا، بتایا جائے انہیں سرکاری وسائل استعمال کرکے جلسے کرنے کا حق کس نے دیا؟ یہ ان کا خاندانی پیسہ تو نہیں، یہ پاکستان کے عوام کا پیسہ ہے، قوم آپ سے سیاسی وسائل کے استعمال کا حساب لے گی۔

انہوں نے کہا ہے کہ عوام کی محنت کی کمائی جلسوں میں اڑائی جارہی ہے، پاکستان میں ڈیزل کا نام عمران خان سے منسوب ہونا چاہیے، عمران خان کے دور میں ڈیزل کی قیمت سب سے زیادہ ہوئی ہے، کیا عمران خان کو شرم آتی ہے کہ سیاستدانوں کے خلاف غلط زبان استعمال کرتا ہے؟ دوسروں کو چوہا کہنے والا عمران خود چوہا ہے، عمران خان عوام کا آٹا اور چینی کھانے والا چوہا ہے۔