وزیراعظم کی زیرصدارت اعلیٰ سطح اجلاس، ملکی سیکیورٹی اور مشرقِ وسطیٰ کی تازہ صورتحال پر غور

اسلام آباد: وزیراعظم شہباز شریف کی زیرِ صدارت ملکی سکیورٹی پر اعلیٰ سطح اجلاس اختتام پذیر ہو گیا۔

اجلاس میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، نائب وزیراعظم و وزیرِ خارجہ اسحاق ڈار، وفاقی وزراء احسن اقبال، محسن نقوی، اعظم نذیر تارڑ، احد خان چیمہ، عطاء اللہ تارڑ، علی پرویز ملک، معاون خصوصی طارق فاطمی سمیت اعلیٰ سول و عسکری حکام نے شرکت کی۔

وزیر اعظم کی زیر صدارت منعقدہ اجلاس میں بدلتی عالمی سیکیورٹی اور ملک بھر میں امن و امان کی صورتِ حال کا جائزہ لیا جس میں پاکستان کی مغربی سرحد پر افغان طالبان کی جانب سے جاری جارحیت کے خلاف جوابی کارروائی کا جائزہ لیا۔

دوران اجلاس شرکاء نے پاک افواج اور فضائیہ کی جانب سے فتنہ الخوارج کی سرکوبی کے لیے مؤثر، جامع کارروائیوں کی تعریف کی، شرکاء کا پاکستان کی سالمیت، خودمختاری اور وقار کی ہر قیمت پر حفاظت کے عزم کا اعادہ کیا۔

اجلاس میں امریکہ و اسرائیل کی جانب سے ایران پر حملے کے بعد پیدا ہونے والی صورتِ حال اور مشرق وسطیٰ اور خلیجی ممالک میں ہونے والے حملوں کے بعد کی صورت حال پر بھی غور کیا گیا۔

وزیراعظم کی ہدایت پر ایرانی صورتحال کے تناظر میں پاکستانی شہریوں کے انخلا کے اقدامات کا بھی جائزہ لیا گیا۔ دفتر خارجہ کی جانب سے شہریوں کی بحفاظت واپسی کے حوالے سے تفصیلی بریفنگ دی گئی۔

اجلاس کو بتایا گیا کہ آذربائیجان کے ذریعے ایرانی سرزمین سے پاکستانی شہریوں کے انخلا کو ممکن بنایا جا رہا ہے،علاوہ ازیں عالمی سکیورٹی صورتحال کے تناظر میں جامع و متفقہ قومی خارجہ و داخلہ پالیسی کی تشکیل کے عزم کا اعادہ کیا۔