پاکستان کی حکومت اور عوام دکھ کی اس گھڑی میں ایرانی عوام کے ساتھ شریک ہیں،وزیر اعظم

اسلام آباد: وزیراعظم شہباز شریف نے کہا ہے کہ حکومتِ پاکستان اور عوامِ پاکستان غم اور دکھ کی اس گھڑی میں ایرانی عوام کے ساتھ کھڑے ہیں اور ایران کے سپریم لیڈر آیت اللہ سید علی خامنہ ای کی شہادت پر دلی تعزیت اور ہمدردی کا اظہار کرتے ہیں۔

وزیراعظم نے اپنی ایکس پوسٹ میں مزید کہا ہے کہ پاکستان بین الاقوامی قانون کے اصولوں کی خلاف ورزی پر بھی گہری تشویش کا اظہار کرتا ہے۔ انہوں نے کہا ہے کہ یہ ایک قدیم بین الاقوامی روایت ہے کہ سربراہانِ مملکت یا حکومت کو نشانہ نہیں بنایا جاتا۔

وزیراعظم کا کہنا تھا کہ اللہ تعالی ایرانی عوام کو اس ناقابل تلافی نقصان کو برداشت کرنے کی ہمت اور استقامت عطا فرمائے۔

شہباز شریف نے مزید کہا کہ ہم سید علی خامنہ ای کی روح کے لیے دعا گو ہیں، اللہ پاک ایرانی عوام کو یہ عظیم صدمہ برداشت کرنے کی توفیق عطا فرمائے۔