ہم عوام کے ساتھ کیے گئے ظلم کا حساب لیں گے: حمزہ شہباز

مسلم لیگ ن کے رہنما حمزہ شہباز نے پریس کانفرنس کرتے ہوئے کہا ہے کہ لاہور والوں کا شکریہ، ہمارے لانگ مارچ میں کل عام آدمی بھی اپنے اہلخانہ کے ساتھ شریک ہوئے، کل عوام نے سڑکوں پر نکل کر عدم اعتماد کر دیا۔

حمزہ شہباز کا کہنا تھا کہ ادویات، کھاد اب سب کچھ نایاب ہے، ان کرتوتوں کی وجہ اپوزیشن اور عوام کی منشا ہے کہ نیازی صاحب آپ نے گھر جانا ہے۔

 ان کا کہنا تھا کہ عمران نیازی نے لوگوں کے دلوں پر زخم لگائے ہیں، صحت کارڈ ایک ڈھونگ ہے جو نواز شریف کا منصوبہ تھا، نیازی صاحب ہم آپ کی طرح تماش بینی کرنے نہیں آ رہے کیونکہ ہم کسی امپائر پر یقین نہیں رکھتے۔

انہوں نے کہا ہے کہ اب آپ کو بنی گالہ سے اتار کر عوامی عدالت میں پیش کریں گے، نوکریاں دینے کے بجائے آپ نے لاکھوں افراد کو بے روزگار کر دیا، عام پاکستانیوں سے اپیل کرتا ہوں کہ اس شخص کا احتساب کرے جس نے ایٹمی ملک پر قرضوں کا بوجھ ڈال دیا۔

حمزہ شہباز نے کہا ہے کہ آپ نے آئی ایم ایف کے پاس جا کر بھی خودکشی نہیں کی لیکن عوام خودکشی پر مجبور ہے، اب آپ کے پاس کوئی ٹرمپ کارڈ نہیں ہے۔

ان کا مزید کہنا تھا کہ آپ نے ریاست مدینہ کا نام اپنی جھوٹی ریاست کے لیے استعمال کیا جس کی آپ کو کبھی معافی نہیں ملے گی، آج لوگوں کی آنکھوں میں خون اترا ہوا ہے، تم سے توشہ خانہ کا پوچھا جاتا ہے لیکن تم جواب نہیں آتے کیونکہ تم ہارے ہوئے کھلاڑی ہو۔