آج عمران خان کے پاؤں جلے تو بزدار کے اوپر پاؤں رکھ دیا:مریم نواز

 اسلام آباد میں منعقدہ جلسہ عام سے خطاب کرتے ہوئے مریم نواز نے کہا ہے کہ عمران خان نے کل کے جلسے میں سرکاری وسائل کا استعمال کیا، کل صرف سرکاری گاڑیاں تھیں، آپ کا یوم حساب آگیا، اب آپ کو ہر چیز کا حساب دینا ہوگا۔

مریم نواز نے اپنے خطاب میں کہا کہ مولانا فضل الرحمان کی قیادت میں ہم تمہیں الوداع کہنےآئے ہیں، عمران خان اب اعتماد کھوچکے ہیں، الوداع،الوداع،الوداع۔

انہوں نے کہا ہے کہ عمران خان پر عوام اور پارلیمنٹ نے عدم اعتماد ظاہر کردیا ہے، حکومت میں ہونے کے باوجود آپ 16 میں سے 15 ضمنی الیکشن ہارے، آج آپ اپنی پارٹی کااعتماد بھی کھوچکے ہیں، عمران خان اب صرف ادھر ادھر بھاگ رہا ہے، 10لاکھ تو کیا 10 ہزارلوگوں کا مجمع بھی نہیں لگا سکے، 10 لاکھ چھوڑو172 بندے پورے کرو۔

مریم نواز کا کہنا تھا کہ آپ کے اپنے لوگ آپ سے بھاگ رہے ہیں، آج عمران خان کے پاؤں جلے توبزدارکے اوپر پاؤں رکھ دیا، کیا اس وزیراعظم کو ایوان میں بیٹھنے کا حق ہے؟ عمران خان کے اقتدار کی کشتی ڈوب رہی ہے، آج آپ کی کشتی ڈوبنے لگی توعثمان بزدارکو پانی کے اندردھکیل دیا۔

ان کا کہنا تھا کہ آنے والے دن بتائیں گے کہ ایسے شخص کا انجام کیا ہوتا ہے؟ کل تک جووسیم اکرم پلس تھا، آج اس کوپانی میں دھکا دے دیا،کشتی ڈوبنے لگی تو کہا بیرونی سازش ہورہی ہے،لوگوں کوجلسے میں بلایا کہ سرپرائزدوں گا، کھودا پہاڑ نکلا چوہا۔

انہوں نے کہا کہ عمران خان زندگی میں تو کسی کے بن جاؤ، جہانگیر ترین کا پیسہ اور جہاز استعمال کیا مگر اس کا بھی نہیں بن سکا،علیم خان جیسے دوست کو بھی اس شخص نے نہیں چھوڑا، جو شخص اپنے محسنوں کا نہیں بن سکا وہ قوم کا کیا بنے گا؟

ان کا مزید کہنا تھا کہ آپ ہرملک میں کشکول لے کرجاتے ہیں کہ کچھ دویہ آپ کی فارن پالیسی ہے، اگرپاکستان کے خلاف کوئی سازش ہوئی ہے تواس کاآلہ کارعمران خان ہے۔