پی ڈی ایم میں حالیہ عدم اتفاق کے باعث لانگ مارچ موخر ہونے کا خدشہ

پاکستان ڈیموکریٹک موومنٹ ( پی ڈی ایم)  سربراہی اجلاس کی  اندرونی کہانی سامنے آگئی،پی ڈی ایم میں حالیہ عدم اتفاق کے باعث لانگ مارچ  موخر ہونے کا خدشہ سامنے آگیا۔مولانا فضل الرحمان نے کہا کہ  آج اپوزیشن کو حتمی فیصلے کے لئے بلایا گیا ہے۔

پاکستان پیپلز پارٹی نے ایک مرتبہ پھر سینٹرل ایگزیکٹو کمیٹی سے مشاورت کیلئے مہلت مانگ لی،سابق صدر آصف علی زرداری نے کہا کہ  آج جو موقف پیش کیا ہے وہ سی ای سی فیصلوں کی روشنی میں بیان کیا ہے،استعفوں کے معاملے پر پارٹی سے مزید مشاورت ضروری ہے۔

جے یو آئی ، ن لیگ سمیت دیگر جماعتوں کا موقف ہے کہ  استعفوں کے بغیر لانگ مارچ کا کوئی فائدہ نہیں ہوگا، جب تک استعفے نہیں دیں گے ، حکومت کو دباؤ میں نہیں لایا جاسکتا۔

سینیٹ میں اپوزیشن لیڈر کے معاملے پر بھی اختلاف سامنے آگیا۔پیپلزپارٹی کا مطالبہ ہے کہ  اکثریتی جماعت کو ہی اپوزیشن لیڈر دیا جائے  جس پر دیگر جماعتوں نے تحفظات کا اظہار کیا کہ  چیئرمین، ڈپٹی چیئرمین اور اپوزیشن لیڈر کے حوالے سے ایک حتمی مشاورت ہوچکی تو پھر نیا مطالبہ کیوں۔

پی ڈی ایم کے سربراہ مولانا فضل الرحمان نے کہا کہ  9 جماعتیں ایک طرف اور پیپلز پارٹی دوسری طرف ہے، پیپلز پارٹی صرف اپنی جماعت کو نہیں پوری اپوزیشن کے موقف کو سامنے رکھے۔

خیال  رہے کہ  پی ڈی ایم کے سربراہی اجلاس میں سابق صدر آصف زرداری نے نواز شریف سے وطن واپسی کا مطالبہ کردیا۔آصف زرداری نے کہا کہ میں نے اپنی زندگی کے 14 برس جیل میں گزارے ہیں۔ میاں صاحب پلیز پاکستان تشریف لائیں اگر لڑنا ہے تو ہم سب کو جیل جاناپڑے گا۔