متحدہ اپوزیشن کی پارلیمنٹ کے باہر میڈیا سے گفتگو 

تفصیلات کے مطابق اسلام آباد پارلیمنٹ ہاؤس کے باہر میڈیا سے گفتگو میں قائد حزب اختلاف شہباز شریف نے کہا کہ آج پھر اسپیکر نے پارلیمانی روایات کی دھجیاں اڑائیں۔ انہوں نے کہا کہ ایجنڈے کے مطابق عدم اعتماد پر بحث ہونی تھی، قوم نے دیکھا کہ ڈپٹی اسپیکر نے ووٹنگ نہیں کرائی۔

قائد حزب اختلاف نے کہا کہ متحدہ اپوزیشن کے 172 لوگ کھڑے تھے، تمام ممبران نے کہا کہ وقفہ سوالات کی بجائے ووٹنگ کرائی جائے۔

اپنی گفتگو میں انہوں نے وزیر اعظم عمران خان کو تنقید کا نشانہ بناتے ہوئے کہا کہ عمران خان نے اسٹیٹ بینک سے فنڈنگ چھپائی، ان کو اپنے گریبان میں جھانکنا چاہیے۔ 

چیئرمین پیپلز پارٹی بلاول بھٹو نے کہا کہ عمران خان کے پاس فرار ہونے کا کوئی راستہ نہیں ہے، وزیراعظم عزت کے ساتھ استعفیٰ دے دیں۔

ان کا کہنا تھا کہ این آر او کے لیے اب بہت دیر ہوچکی ہے، وزیر اعظم عمران خان کے پاس کوئی محفوظ راستہ نہیں رہا۔

اپوزیشن نے آج اسمبلی میں 175 ارکان پیش کیے. تمام ادارے اپنی حدود میں رہیں تو جمہوریت کی جیت ہے۔