کل کے لیےایک سے زیادہ پلان بنا رکھے ہیں،وزیراعظم

تفصیلات کے مطابق وزیر اعظم عمران خان نے قوم سے براہ راست ٹیلی فونک گفتگو میں کہا کہ کل کے لیے انہوں نے ایک سے زیادہ پلان بنا رکھے ہیں، کامیاب ہو کر قوم کو خوشخبری دیں گے۔ انہوں نے کہا کہ وہ اپوزیشن کو اسمبلی میں شکست دیں گے۔

وزیراعظم نے کہا کہ حکومت گرانے کے لیے بکروں کی طرح نیلامی ہورہی ہے، حکومت کے خلاف عالمی سازش ہورہی ہے۔ انہوں نے نوجوانوں سے اپیل کی کہ اس سازش کے خلاف اپنے مستقبل کے لیے احتجاج کریں ، اگر سازش کامیاب ہوگئی تو کوئی بھی باہر کی قوت ناپسند پاکستانی حکومت کو پیسوں کے ذریعے گرا دیا کرے گی۔

ان کا کہنا تھا کہ ملک آج اہم دوراہے پر کھڑا ہے، عوام نے فیصلہ کرنا ہے کہ وہ کدھر کھڑے ہوتے ہیں، نیوٹرل ہونے کا مطلب ہے کہ آپ برائی کے خلاف کھڑے ہیں، ہمیں اچھائی کے ساتھ کھڑا ہونے کا حکم دیا گیا ہے۔

اپوزیشن  کے حوالے سے انہوں نے کہا کہ اپنے ملک کے ساتھ غداری قبول نہیں کریں گے، قانونی ماہرین سے ملاقات کی ہے، غداروں پر مقدمات ہوں گے۔

وزیر اعظم نے کہا کہ شہباز شریف نے کل کہہ دیا بھکاری غلام ہوتے ہیں، شہباز شریف نے 22 کروڑ عوام کو بھکاری قرار دیا، شہباز شریف پر اربوں روپے کے کرپشن کے مقدمات ہیں، شہباز شریف تو ہے ہی غلام، یہ پیسے کی پوجا کرتے ہیں، شہباز شریف ایسے ہی زندگی گزارنی ہے تو اس سے اچھا مر ہی جائیں۔

وزیراعظم نے افواج پاکستان کے حوالے سے بات کرتے ہوئے کہا کہ پاک فوج پر کسی قسم کی تنقیدنہ کریں۔ انہوں نے کہا پاک فوج نے ملک و قوم کے لیے بہت قربانیاں دی ہیں، پاک فوج نے ملک کو اکٹھا کیا ہوا ہے، فوج کے نیوٹرل رہنے کے فیصلے کا احترام کرتے ہیں۔

ان کا مزید کہنا تھا کہ بیرونی سازش پاک فوج اور تحریک انصاف کے خلاف ہے، پاک فوج کے خلاف عوام کو تقسیم کرنے کی سازش ہو رہی ہے۔