فوج اور عوام میں پھوٹ پیدا کرنےکی کوشش برداشت نہیں کریں گے: آرمی چیف

پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ نے لاہور گیریژن کا دورہ کیا جہاں کور کمانڈر لیفٹیننٹ جنرل محمد عبدالعزیز نے ان کا استقبال کیا۔

آئی ایس پی آر کی جانب سے جاری بیان میں بتایا گیا ہے لاہور گیریژن کے دورے کے موقع پر آرمی چیف نے دو الگ الگ انٹرایکٹو سیشنز میں افسران اور سابق فوجیوں سے ملاقات کی۔

اس موقع پر آرمی چیف نے کہا کہ کسی صورت بھی فوج اور عوام میں پھوٹ پیدا کرنےکی کوشش برداشت نہیں کریں گے۔

انہوں نے کہا کہ فوج کی طاقت عوام سے ہے، دشمن قوتیں طویل عرصے سے پھوٹ ڈالنےکی کوشش کررہی ہیں، دشمن قوتوں کو ان کے مذموم مقاصد میں کامیاب نہیں ہونے دیں گے۔

آئی ایس پی آر کے مطابق آرمی چیف جنرل قمر جاوید باجوہ نے کمبائنڈ ملٹری اسپتال لاہور کا بھی دورہ کیا۔ 

آرمی چیف نے سی ایم ایچ میں میجر حارث کی عیادت کی اور واقعے سے متعلق کہا کہ قانون اپنا راستہ اختیار کرے گا۔

آرمی چیف نے کہا کہ کسی کو قانون ہاتھ میں لینےکی اجازت نہیں دی جا سکتی، زیرحراست ملزمان کو انصاف کے کٹہرے میں لایاجائےگا۔

واضح رہے کہ میجر حارث کو بدھ کے روز لیگی رہنما سلمان رفیق اور حافظ نعمان کےگارڈز نےتشدد کا نشانہ بنایا تھا جس سے وہ شدید زخمی ہو گئے تھے۔