پی ڈی ایم کا اتحاد توڑنے کی سازشیں ہورہی ہیں ، مولانا فضل الرحمان

پاکستان ڈیموکریٹک موومنٹ (پی ڈی ایم ) کے سربراہ  مولانا فضل الرحمان کا کہنا ہے کہ  پی ڈی ایم کا اتحاد توڑنے کی سازشیں ہورہی ہیں لیکن ہم بچے نہیں ہیں، اللہ نے ہمیں عقل دی ہے، اگر اپنا نفع نقصان نا سمجھ سکیں توہمیں سیاست کرنے کا کوئی حق نہیں ہے،میرے آصف علی زرداری ، میاں نوازشریف سمیت سب سے رابطے ہیں،پیپلزپارٹی نے اپنی سی ای سی کا اجلاس بلالیا ہے، مثبت جواب کی امید ہے۔

فضل الرحمان نے کہا کہ تجویز آرہی ہے کہ پہلے مرحلے میں صرف قومی اسمبلی سے استعفے دیے جائیں،دوسرے مرحلے میں صوبائی اسمبلیوں سے استعفے دینے کی تجویز ہے، سندھ اسمبلی سے سب سے آخر میں مستعفی ہونے کی تجویز ہے۔انہوں نے کہا کہ  یہ طے ہے کہ ہمارے پاس احتجاجی تحریک کے علاوہ کوئی راستہ نہیں ہے،اگر صرف ایوانوں میں لڑنا ہے تو پھر پی ڈی ایم کیوں بنائی؟ہمیں اسمبلیوں میں جانے یا عوام میں جانے میں سے ایک راستہ منتخب کرنا ہے اور  ہم نے عوام میں جانے کا فیصلہ کرلیا ہے۔

 مولانا فضل الرحمان نے مزید کہا کہ  اب لانگ مارچ رمضان کے بعد ہونے کی امید ہے، ہم بھارت کے حوالے سے چیف آف آرمی اسٹاف کے بیان کے حامی ہیں، بھارت کے ساتھ جنگ لڑنے کا کوئی فائدہ نہیں، اس سے نقصان کا اندیشہ زیادہ ہے، بھارت کے ساتھ معاملات مذاکرات کے ذریعے حل ہونے چاہئیں نہ کہ جنگ سے، کشمیرکے حوالے سے موجودہ حکومت نے جو نقصان پہنچایا اس کی تلافی ہوتی نظرنہیں آرہی، اگر تلافی کرنا ہے تو اسی سوچ کی حکومت بھی ہونی چاہیے۔