پشاور کور کمانڈر کے حوالے سے کچھ سیاستدانوں کے بیانات نامناسب ہیں:آئی ایس پی آر

پاک فوج کے شعبہ تعلقات عامہ کی جانب سے جاری بیان میں پشاور کور کمانڈر کے حوالے سے حالیہ بیانات کو انتہائی نامناسب قرار دیا گیا ہے۔

آئی ایس پی آر نے کہا ہے کہ پشاور کور پاکستان فوج کی ممتاز فارمیشن ہے، اس کور کی کمانڈ ہمیشہ پروفیشنل ہاتھوں میں رہی ہے،پشاور کور 2 دہائیوں سے دہشتگردی کے خلاف جنگ میں ہراول دستے کا کردار ادا کر رہی ہے۔

آئی ایس پی آر کی جانب سے جاری بیان میں کہا گیا ہے کہ افواج پاکستان کے سپاہی اورافسران وطن کی خودمختاری اور سالمیت کی حفاظت جان ہتھیلی پر رکھ کرکر رہے ہیں، ایسے بیانات فوج اور قیادت کے مورال اور وقار پر منفی اثر ڈالتے ہیں۔

جاری بیان میں کہا گیا ہے کہ پشاورکورکمانڈر سے متعلق سینیئر سیاستدانوں کے حالیہ بیانات انتہائی نامناسب ہیں، سیاسی قیادت سے توقع ہےکہ وہ ادارے کے خلاف متنازع بیانات سے اجتناب کرے۔

ڈی جی آئی ایس پی آر میجر جنرل بابر افتخار نے دو ٹوک کہا کہ ہم بار بار درخواست کر رہے ہیں کہ فوج کو سیاست میں نہ گھسیٹاجائے، ہمارا سیاست میں کوئی عمل دخل نہیں،پاکستان کے قانون کے مطابق فوج کو سیاست سے دور رہنےکا حکم ہے۔

ڈی جی آئی ایس پی آر نے کہا کہ چاہے سیاستدان ہیں یا میڈیا درخواست کی جاتی ہے فوج کو سیاسی گفتگو سے الگ رکھیں،ہم بطور ادارہ کافی عرصے سے برداشت اور تحمل کا مظاہرہ کر رہے ہیں،سکیورٹی چیلنجز بہت زیادہ ہیں،افواج مشرقی، مغربی سرحد، شمال میں اندرونی سکیورٹی کی اہم ذمہ داریاں اداکررہی ہیں۔

ترجمان پاک فوج میجر جنرل بابر افتخار کا کہنا ہے کہ افواج پاکستان کی تمام لیڈرشپ کی توجہ ملکی سکیورٹی کی ذمہ داریوں اور ملک کی حفاظت پر ہے۔