پاک ویسٹ انڈیز سیریز کیلئے ٹکٹوں کی فروخت کا آغاز

پاکستان کرکٹ بورڈ (پی سی بی ) کی جانب سے جاری بیان  کے مطابق   پاکستان بمقابلہ ویسٹ انڈیز کرکٹ سیریز کے لیے ٹکٹوں کی فروخت شروع ہو گئی ہے، ٹکٹ کی کم سے کم قیمت 300 روپے،  زیادہ سے زیادہ 500 روپے مقرر کی گئی ہے۔

الٰہی برادرز، حنیف محمد، مشتاق احمد اور وسیم اکرم انکلوژرز کے ٹکٹ کی 300 روپے مقرر کی گئی ہے جبکہ فضل محمود، عمران خان، جاوید میانداد اور ظہیر عباس انکلوژرز کے ٹکٹ کی قیمت 500 روپے مقرر کی گئی ہے۔

سیریز کے تمام میچز آئی سی سی مینز کرکٹ ورلڈ کپ سپر لیگ میں شامل ہیں۔

پاک ویسٹ انڈیز سیریز کے لیے کمنٹری پینل کا بھی اعلان کردیا گیا ہے ۔ پینل میں این بشپ، جیف ڈوجون، بازید خان، ثناء میر اور عروج ممتاز شامل ہیں جبکہ زینب عباس بطور براڈکاسٹ پرزینٹر ذمہ داریاں ادا کریں گے۔

سیریز میں شامل تین ون ڈے انٹرنیشنل میچز کی براڈکاسٹ کوریج کے لیے 21 ایچ ڈی کیمروں سمیت ڈی آر ایس کے لیے ہاک آئی کیمروں کا استعمال بھی کیا جائے گا۔

واضح رہے کہ ویسٹ انڈیز کی ٹیم رواں ماہ 3 ون ڈے میچوں کی سیریز کھیلنے کے لیے پاکستان آ رہی ہے اور دونوں ٹیموں کے درمیان میچ بالترتیب 8، 10 اور 12 جون کو کھیلے جائیں گے ۔

پی سی بی کی جانب سے ویسٹ انڈیز کے خلاف اعلان کردہ 16 رکنی قومی اسکواڈ میں 3 اوپنرز، 3 مڈل آرڈر بیٹرز، 2 وکٹ کیپرز، 3 اسپنرز کو شامل کیا گیا ہے جب کہ 5 فاسٹ بولرز کو بھی قومی اسکواڈ کا حصہ بنایا گیا ہے۔