ترکی نے باضابطہ طور پر اپنا نام تبدیل کر لیا

اقوام متحدہ نے ترکی کی جانب س ملک کا نام تبدیل کرنے کی درخواست منظور کرلی ہے جس کے بعد ترکی کو اب ‘ترکیہ‘  Türkiye  کے نام سے پکارا جائےگا ۔ 

مملکت کی جانب سے نام کی تبدیلی، ملک کو نئی پہچان دینے کی مہم کا حصہ ہے ۔ ترک عوام کی اکثریت پہلے ہی ملک کو ترکیہ پکارتی ہے۔

اقوام متحدہ کے سیکریٹری جنرل انتونیو گوتریز کے ترجمان اسٹیفن دوجارک کا کہنا ہے کہ ملک ترکی کے نام کے ہجے میں تبدیلی کا مقصد بین الاقوامی سطح پر ملک کے وقار میں اضافہ کرنا ہے۔

مذکورہ تبدیلی کی پہل سرکاری مواصلات اور برآمدی مصنوعات پر درج نام سے کی جائے گی ۔ برآمدی مصنوعات پر “Made in Turkey” کے بجائے “Made in Turkiye” کا جملہ استعمال کیا جا رہا ہے۔

ایک سرکاری بیان میں کہا گیا ہے کہ لفظ  ‘Türkiye’  بہترین طریقے سے قوم کی ثقافت، تہذیب اور اقدار کی نمائندگی اور اظہار کرتا ہے۔

خیال رہے کہ ملکوں کی طرف سے اپنا نام تبدیل کرنے کا فیصلہ کوئی نئی بات نہیں ہے۔

2020 ء میں نیدرلینڈز نے نام ہالینڈ استعمال کرنا بند کر دیا تھا ۔ اس سے قبل میسیڈونیا نے اپنا نام بدل کر شمالی میسیڈونیا رکھ لیا تھا جس کی وجہ یونان سے سیاسی تنازع تھا اور سوازی لینڈ نے 2018 ء میں اپنا نام ای سواتینی رکھ لیا تھا۔