ویسٹ انڈیز کی ٹیم آج اسلام آباد پہنچے گی

رپورٹس کے مطابق اسلام آباد پہنچنے کے بعد ویسٹ انڈیز کے کھلاڑیوں کو چارٹرڈ فلائٹ کے ذریعے ملتان پہنچایا جائے گا۔

پاکستان اور ویسٹ انڈیز کے درمیان سیریز کا پہلا ایک روزہ میچ آٹھ جون کو ملتان کرکٹ اسٹیڈیم میں دوپہر چار بجے شروع ہو گا، پاک ویسٹ انڈیز سیریز آئی سی سی مینز کرکٹ ورلڈکپ سپر لیگ کا حصہ ہے۔

ملتان کرکٹ اسٹیڈیم میں پاکستان اور ویسٹ انڈیز کی ٹیموں کا ٹریننگ سیشن منگل کی شام ساڑھے چار سے رات 8 بجے تک ہوگا۔

پاکستان اور ویسٹ انڈیز کے ٹریننگ سیشنز سے قبل قومی کرکٹ ٹیم کے کپتان بابراعظم اور مہمان اسکواڈ کے کپتان نکولس پوران میڈیا کانفرنسز کریں گے۔

یاد رہے کہ پاکستان اور ویسٹ انڈیز کے درمیان دوسرا ون ڈے میچ 10 جون جبکہ تیسرا اور آخری ون ڈے میچ اتوار 12 جون کو کھیلا جائے گا۔

پاکستان بمقابلہ ویسٹ انڈیز کرکٹ سیریز کے لیے ٹکٹوں کی فروخت بھی  شروع ہو گئی ہے ، ٹکٹ کی کم سے کم قیمت 300 روپے،  زیادہ سے زیادہ 500 روپے مقرر کی گئی ہے۔

پی سی بی کی جانب سے ویسٹ انڈیز کے خلاف اعلان کردہ 16 رکنی قومی اسکواڈ میں 3 اوپنرز، 3 مڈل آرڈر بیٹرز، 2 وکٹ کیپرز، 3 اسپنرز کو شامل کیا گیا ہے جب کہ 5 فاسٹ بولرز کو بھی قومی اسکواڈ کا حصہ بنایا گیا ہے۔