لاہور ہائیکورٹ کا مریم نواز کو 12 اپریل تک گرفتار نہ کرنے کا حکم

 جی این این کے مطابق جسٹس سرفراز ڈوگر کی سربراہی میں دو رکنی بنچ نے مریم نواز کی درخواست پر سماعت کی، مریم نواز نے درخواست میں مؤقف اختیار کیا کہ قومی احتساب بیورو (نیب) نے دو تحقیقات میں 26 مارچ کو طلب کر رکھا ہے اور  درخواست گزار کو 26 مارچ کو گرفتار کیا جا سکتا ہے اس لیے عدالت نیب کو گرفتاری سے روکے۔عدالت نے درخواست منظور کرتے ہوئے مریم نواز کو 12 اپریل تک گرفتار نہ کرنے کا حکم دے دیاعدالت نے نیب کو نوٹس جاری کر دیئے۔ 

واضح رہے کہ نیب لاہور نے مریم نواز کو 26 مارچ کو 1500 کنال کی مبینہ غیر قانونی منتقلی کیس، اور چوہدری شوگر ملز کیس میں طلب کر رکھا ہے، جس پر مسلم لیگ ن کی مرکزی نائب صدر نے نیب کے سامنے پیش ہونے کا فیصلہ کیا ہے ۔ جبکہ نیب   نے مریم نواز کی پیشی کے موقع پر امن و امان کی صورتحال برقرار رکھنے کے لیے لاہور آفس کے اطراف کا علاقہ ریڈ زون قرار دے کر سیکورٹی رینجرز کے سپرد کر دی۔

اس سے سلسلے میں گزشتہ روز نیب کی جانب سے ایک اعلامیہ بھی جاری کیا گیا، جس میں کہا گیا ہے کہ نیب لاہور نے فول پروف سیکیورٹی کے لیے پولیس اور رینجرز کی معاونت لینے کا فیصلہ کیا ہے، اور قانون نافذ کرنے والے اداروں کو نیب کی عمارت کی فول پروف سیکیورٹی کی درخواست دے دی ہے۔ وزارت داخلہ نے نیب کی درخواست پر رینجرز تعینات کرنے کی منظوری بھی دے دی ہے جس کے بعد نیب آفس سے ایک کلومیٹر تک کا علاقہ ریڈ زون ہوگا۔