لاہور سمیت پنجاب کے 9 اضلاع میں اسکول 11اپریل تک بند رکھنے کا فیصلہ

تفصیلات کے مطابق این سی اوسی اجلاس کے بعد وفاقی وزیر تعلیم شفقت محمود نے پریس کانفرنس  میں بتایا کہ  11 اپریل تک مخصوص اضلاع میں تعلیمی ادارے بند رہیں گے ، لاہور، راولپنڈی، گوجرانوالہ، گجرات ، ملتان ، فیصل آباد، سیالکوٹ، سرگودھا اورشیخوپورہ میں سکول بند رہیں گے۔  پنجاب کےدیگراضلاع میں پرانے شیڈول کے مطابق سکول کھلیں گے۔  وفاقی وزیرنے کہاکہ   لاہور سمیت پنجاب کے چند اضلاع میں بیماری کا پھیلاؤ  تشویش ناک  ہے ،کے  پی اور آزاد کشمیر میں بھی کئی اضلاع میں کیسز زیادہ ہو رہے ہیں ،سندھ اور بلوچستان میں کیسز کی تعداد کم ہے ،ان سب چیزوں کو دیکھتے ہوئے فیصلہ لیا گیا  ہے ۔ تمام تعلیمی ادارے بند کرنے کا 28 تاریخ تک بند رکھنے کا فیصلہ کیا گیا تھا  ، تاہم اب 11اپریل تک تعلیی ادارے بند کرنے کا فیصلہ کیا گیا ہے ۔

شففقت محمود نے کہا کہ این سی او سی کے اجلاس میں بورڈز کے امتحانات کے حوالے سے یہ فیصلہ کیا گیا ہے کہ نویں دسویں گیارہویں اور بارہویں جماعت کے امتحانات صوبائی حکومتوں اور بورڈز کے اعلان کردہ شیڈول کے مطابق ہوں گے۔

وفاقی وزیر تعلیم شفقت محمود کی سربراہی میں کورونا کی صورتحال کا جائزہ لینے کے لیے اہم اجلاس نیشنل کمانڈ اینڈ کنٹرول سینٹر (این سی او سی) میں ہوا۔اجلاس میں چاروں صوبوں کے وزرائے تعلیم و صحت شریک ہیں، گلگت بلتستان، آزاد جموں کشمیر کے وزراء، اعلی حکام شریک ہوئے۔ اجلاس میں وفاقی سیکرٹری تعلیم فرح حامد خان، پارلیمانی سیکرٹری تعلیم وجیہہ قمر اور چیئرمین ایچ ای سی بھی شریک ہیں۔ صوبائی وزراء تعلیم ویڈو لنک سے اجلاس میں شریک ہوئے۔

خیال رہے کہ 10مارچ کو حکومت نے کورونا کے بڑھتے کیسز کے باعث پنجاب کے 7 شہروں میں تعلیمی ادارے 2 ہفتے کے لیے بند کرنے کا اعلان کیا تھا ۔اس حوالے سے  وزیر تعلیم کاکہنا تھا کہ   لاہور، فیصل آباد، گوجرانوالہ، گجرات، ملتان، راولپنڈی اور سیالکوٹ میں 15 مارچ سے بہار کی چھٹیوں کا اعلان کیا جا رہا ہے جبکہ اسلام آباد کے تعلیمی ادارے بھی پیر سے دو ہفتے کے لیے بند ہوجائیں گے، اس کے علاوہ پشاور اور مظفر آباد میں بھی تعلیمی ادارے 15 سے 28 مارچ تک بند کر دیئے گئے تھے ۔