زرداری کا مولانا فضل الرحمٰن سے ٹیلی فونک رابطہ ، معاملات مل کر حل کرنے پر اتفاق

تفصیلات کے مطابق   پیپلزپارٹی کے شریک چئیرمین سابق صدر آصف زرداری نے جمیعت علمائے اسلا م (ف) اور پی ڈی ایم سربراہ مولانا فضل الرحمٰن سے ملک کی سیا سی صورتحال بارے گفتگو ہوئی۔  سابق صدر آصف علی زرداری سے ٹیلی فونک گفتگو میں مولانا فضل الرحمان نے کہا کہ پی ڈی ایم کی تمام جماعتوں کو مشترکہ فیصلوں کا احترام کرنا چاہیے، فیصلہ کے مطابق سینیٹ میں قائد حزب اختلاف کی نشست نون لیگ کی ہے، اُمید ہے پیپلزپارٹی پی ڈی ایم کے فیصلوں کا احترام کرے گی۔ دونوں رہنماؤں  نے اتفاق کیا کہ تمام معاملات مل جل کر حل کریں گے۔

پی  ڈی ایم سربراہ فضل الرحمان نے ن لیگ اور پیپلز پارٹی کے رہنماؤں کی ایک دوسرے کے خلاف بیان بازی پر مایوسی کا بھی اظہار کیا ۔  مولانا فضل الرحمان کا کہنا تھا کہ  یہ طے ہوا تھا 4 اپریل سے قبل کوئی کسی کے خلاف متنازعہ بیان نہیں دے گا، بلاول اور مریم سمیت دیگر رہنماؤں کے حالیہ بیانات پر بہت مایوسی ہوئی ہے، جو فیصلے پی ڈی ایم اجلاس میں ہوئے تھے ان پر عمل ہونا چاہیے، استعفوں اور لانگ مارچ پر پی پی نے خود وقت مانگا اس لیے سب انتظار کریں۔ 

واضح رہے کہ   پی ڈی ایم کے سربراہی اجلاس  میں  پیپلز پارٹی اور پی ڈی ایم کی دیگر جماعتوں میں استعفوں کے معاملے پر اختلافات سامنے آئے تھے ،  سربراہی اجلاس  میں مو لانا فضل الرحمان نے   26 مارچ کو ہونے والے لانگ مارچ کو ملتوی کرنے کا  اعلان کیا تھا ۔