یوسف رضا گیلانی سینیٹ میں قائد حزب اختلاف مقرر

تفصیلات کے مطابق چیئرمین سینیٹ صادق سنجرانی، اراکین کے دستخطوں کی تصدیق کے بعد اپوزیشن لیڈر کی نامزدگی کا نوٹیفیکیشن جاری کردیا ۔ پیپلز پارٹی کے سینیٹر یوسف رضا گیلانی نے ایوان بالا میں قائد حزب اختلاف بننے کیلئے 30 سینیٹرز کے حمایتی دستخطوں کے ساتھ درخواست جمع کرا ئی تھی۔  اس ضمن میں شیری رحمان کا کہنا ہے کہ سینیٹ میں اپوزیشن لیڈر کے لئے 30 اراکین کے دستخط کے ساتھ درخواست جمع کروائی گئی ہے جس میں 21پیپلزپارٹی، 2 اے این پی اور ایک جماعت اسلامی کا رکن شامل ہیں۔شیری رحمان نے بتایا کہ  فاٹا 2، دلاور خان کے آزاد گروپ کے 4 ممبران نے حمایت کی ہے۔

واضح رہے کہ  سینیٹ  کے نئے اپوزیشن لیڈر کے معاملے پر پیپلز پارٹی اور مسلم لیگ (ن) میں اختلافات کھل  کرسامنے آئے تھے۔قبل ازیں مسلم لیگ (ن) سینیٹ سیکریٹریٹ میں سینیٹر اعظم نذیر تارڑ کو اپوزیشن لیڈر کے عہدے کے لیے نامزد کرنے کی درخواست جمع کرواچکی تھی۔

اعظم نذیر تارڑ کی نامزدگی کے لیے مسلم لیگ (ن) کے 17 اراکین سینیٹ نے دستخط کیے اس کے علاوہ جمعیت علمائے اسلام (ف) کے 5 سینیٹرز اور نیشنل پارٹی اور پختونخوا ملی عوامی پارٹی کے 2، 2 اراکین نے حمایت کی یقین دہانی کروائی تھی۔مسلم لیگ (ن) نے سینیٹ اپوزیشن لیڈر کے لیے اعظم تارڑ کو نامزد کیا تھا لیکن پیپلز پارٹی نے نہ صرف اسے مسترد کردیا تھا بلکہ اس پر احتجاج بھی کیا تھا کیوں کہ وہ بینظیر بھٹو قتل کیس کے ملزمان پولیس افسران کے وکیل تھے۔