کوٹ لکھپت جیل میں شہباز شریف کو کورونا ویکسین لگا دی گئی

تفصیلات کے مطابق   اپوزیشن لیڈر قومی اسمبلی  شہباز شریف کو   جیل میں کورونا ویکسین جناح اسپتال ایم ایس کی نگرانی  میں   میڈیکل ٹیم نے لگائی ہے ۔   شہباز شریف کی عمر 69 سال سے زائد ہے  اور بزرگ شہری ہونے کی حیثیت سے ویکسین لگائی گئی ہے ۔ ویکسین کو دوسری ڈوز 21 دن بعد لگائی جائے گی ۔ جیل ذرائع کا کہنا ہے کہ شہباز شریف نے احتساب عدالت میں ویکسین لگوانے کی اپیل کی تھی۔

دوسری جانب نیشنل کمانڈ اینڈ آپریشن سینٹر (این سی او سی) کے سربراہ اور وزیر منصوبہ بندی اسد عمر کا کہنا ہے کہ 30 مارچ سے50 سال سے زائد عمر کے افراد کی ویکسین رجسٹریشن کا عمل شروع ہوگا۔  ٹوئٹر پر جاری بیان میں  اسد عمر نے کہا کہ 50 سال سے زائد عمر کےافراد کی ویکسین رجسٹریشن کا عمل 30 مارچ سے شروع ہوگا۔

خیال  رہے کہ ملک بھر میں 60  یا 70 سال سے زیادہ عمر کے افراد کو عالمی وبا کورونا وائرس سے بچاؤ کی ویکسین لگائی جارہی ہے۔

واضح رہے کہ کورونا وائرس کی تیسری لہر کے دوران ہر گزرتے دن کے ساتھ کیسز کی تعداد بڑھتی جا رہی ہے اور 2جولائی  کے طویل عرصے کے بعد ایک دن میں ریکارڈ 4 ہزار368  کیسز اور 63 اموات رپورٹ ہوئیں۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید63  افراد چل بسے جس کے بعد اموات کی مجموعی تعداد 14 ہزار091ہوگئی ہےجبکہ ملک میں کورونا کے فعال کیسز کی تعداد 40ہزار 120ہے، اب تک کورونا کے  6 لاکھ 45ہزار 356کیسز رپورٹ ہوچکے ہیں ۔