یوسف رضا گیلانی کی اپوزیشن لیڈر کیلئے درخواست سے پی ڈی ایم اتحا د کو دھچکا لگا: احسن اقبال

تفصیلات کے مطابق  سینیٹ اپوزیشن لیڈر کے عہدے پر ن لیگ اور پیپلز پارٹی آمنے سامنے  آگئی ،  مسلم لیگ ن  رہنما احسن اقبال   نے میڈیا سے بات کرتے ہوئے کہاکہ  یوسف رضا گیلانی کے جانے سے اپوزیشن اتحاد کو دھچکا لگا ہے یہ نامناسب ہے، پی ڈی ایم کی تمام جماعتوں نے فیصلے کی حمایت کی تھی۔انہوں نے کہا کہ  پی  ڈی ایم جماعتوں نےاعظم نذیر تارڑ کی حمایت کا اعلان کیا، سینیٹ میں اپوزیشن لیڈر کا معاملہ پی ڈی ایم اجلاس میں رکھیں گے۔ یہ   اسی کے پاس عرضی لیکر پہنچ گئے جس کے الیکشن کو عدالت میں چیلنج کر رکھا ہے،  اس سے پی ڈی ایم کے مقاصد ، جدوجہد اور یقینا اپوزیشن کے اتحاد کو دھچکا لگا ہے ، جو مخصوص سینیٹرز جن کی تائید کے ساتھ مطلوبہ نمبر حاصل کیا گیاہے ، میں نہیں کہتا بلکہ پورا اسلام آباد جانتاہے کہ وہ کس کے کہنے پر ووٹ دیتے ہیں ۔

احسن اقبال کا کہناتھا کہ اگر پیپلز پارٹی کیلئے لیڈر آف اپوزیشن کا یہ عہدہ اتنا ناگزیر تھا تو اگر وہ اپنی مجبوری نوازشریف کو بیان کرتے تو وہ خوشی کے ساتھ انہیں یہ عہدہ دے دیتے لیکن بی اے پی سینیٹر کو ملا کر پی ڈی ایم سے مشاورت کے بغیر اپوزیشن اتحاد کو دھچکا لگا۔ اے این پی نے بھی یکطرفہ  فیصلہ کیا ہے تو یہ سوال ضرور اٹھائیں گے ۔

انہوں نے مزید کہا کہ اس ملک کو آئین کے مطابق چلایا جائے ہر ادارہ اپنا کام کرے، عوام چاہتی ہے پاکستان کو آئین کی روشنی میں تشکیل نو کیا جائے۔  نیب قومی اداروں کیخلاف بیان پر ایکشن لےسکتاہے،نیب ایس او پیز کی خلاف ورزی پروزیراعظم کونوٹس جاری کرے۔

خیال رہے کہ سینیٹ میں اپوزیشن لیڈرکی تعیناتی کے معاملے پر پی ڈی ایم جماعتوں میں اختلافات برقرار ہیں جب کہ کچھ روزقبل مریم نوازنے مولانا فضل الرحمن کے ہمراہ پریس کانفرنس کرتے ہوئےکہا تھا کہ اصولی فیصلہ ہوچکا کہ سینیٹ میں اپوزیشن لیڈر (ن) لیگ کا ہوگا۔

دوسری جانب   پیپلز پارٹی کے سینیٹر یوسف رضا گیلانی نے ایوان بالا میں قائد حزب اختلاف بننے کیلئے 30 سینیٹرز کے حمایتی دستخطوں کے ساتھ درخواست جمع کرا دی ہے ۔ چیئرمین سینیٹ صادق سنجرانی، اراکین کے دستخطوں کی تصدیق کے بعد اپوزیشن لیڈر کی نامزدگی کا نوٹیفیکیشن جاری کرینگے۔ اس ضمن میں شیری رحمان کا کہنا ہے کہ سینیٹ میں اپوزیشن لیڈر کے لئے 30 اراکین کے دستخط کے ساتھ درخواست جمع کروائی گئی ہے جس میں 21پیپلزپارٹی، 2 اے این پی اور ایک جماعت اسلامی کا رکن شامل ہیں۔شیری رحمان نے بتایا کہ فاٹا 2، دلاور خان کے آزاد گروپ کے 4 ممبران نے حمایت کی ہے۔

یاد رہے اسلام آباد ہائیکورٹ نے چیئرمین سینیٹ الیکشن سے متعلق سید یوسف رضا گیلانی کی درخواست ناقابل سماعت قرار دے کر خارج کر دی تھی۔ عدالت نے تحریری فیصلے میں کہا کہ توقع ہے منتخب نمائندے اور سیاسی قیادت عدالت کو ملوث کیے بغیر تنازعات حل کرنے کی کوشش کریں گے۔