کراچی کے مختلف علاقوں میں صبح سویرے بارش

جی این این کے مطابق کراچی میں صبح سے  مختلف علاقوں میں  بارش  جاری ہے ، صدر ، آئی آئی چندریگر روڈ ، نارتھ کراچی، ناگن چورنگی، سخی حسن ، منگھوپیر، نیو کراچی،بفرزون ، شادمان ٹاون، ناظم آباد ، سائٹ ایریا ، لیاقت آباد اور اطراف کے علاقوں میں بھی بارش ہوئی ۔ 

بارش کا سلسلہ کچھ دیر کے لئے تھم گیا ہے  تاہم محکمہ موسمیات کا کہنا ہے کہ آج دوپہر میں گرج چمک کے ساتھ تیز بارش کا امکان ہے جبکہ مطلع جزوی ابر آلود اور ابر آلود رہے گا۔ 

محکمہ موسمیات کے مطابق  شہر کا موجودہ درجہ حرارت 29 ڈگری سینٹی گریڈ ہے اور 9 کلومیٹر فی گھنٹے کی رفتار سے ہوا چل رہی ہے ۔ دن میں درجہ حرارت 34 سے 36 ڈگری سینٹی گریڈ تک رہے گا  جبکہ دن میں ہوا 18 کلومیٹر فی گھنٹے کی رفتار سے چلے گی ۔ 

دوسری جانب لاڑکانہ، میرپورخاص اور گرد و نواح میں بھی بارش کے بعد گرمی کی شدت کچھ حد تک کم ہوگئی ۔ حیدرآباد کے علاقے لطیف آباد میں درخت گرنے سے 11 کے وی کی تاریں ٹوٹ گئیں، جس کے بعد شدید گرمی میں کئی گھنٹے سے بجلی کی فراہمی معطل ہے۔

محکمہ موسمیات کا کہنا ہے کہ بارش کے سسٹم کی شدت اب بھی بر قرار ہے، سندھ کے مختلف مقامات پر اس سسٹم نے اچھی بارش برسائی ہے، سسٹم 18 جولائی تک سندھ پر اثر انداز رہے گا۔

محکمہ موسمیات نے آج سندھ، بلوچستان اور جنوبی پنجاب سمیت ملک بھر میں بارش کی پیش گوئی بھی کی ہے۔