رکن پنجاب اسمبلی جلیل شرقپوری نے استعفیٰ دے دیا

جی این این کے مطابق ضمنی انتخابات سے قبل مسلم لیگ ن کو بڑا دھچکا لگ گیا ، رکن پنجاب اسمبلی جلیل شرقپوری نے اسپیکر پرویز الٰہی سے ملاقات کی ۔ اس موقع پر جلیل شرقپوری نے کہا کہ شہباز شریف جس طرح اشتہاریوں کے ساتھ چل رہے ہیں، میں کس طرح ان کے ساتھ چل سکتا ہوں۔

انہوں نے مزید کہا کہ عمران خان کے وژن کے ساتھ پہلے بھی تھا اور اب بھی ان کے ساتھ چلوں گا۔ 

ان کا کہنا تھا کہ حلقے کے کارکنوں سے مشورے کے بعد ضمنی الیکشن سے پہلے استعفیٰ دینے آیا ہوں، آج ایک سوچ اور نظریے کے تحت استعفیٰ دیا ہے۔

اسپیکر پنجاب اسمبلی نے جلیل شرقپوری کا استعفیٰ منظور کرلیا ہے جس کا نوٹیفکیشن بھی جاری کردیا گیا ہے۔

دوسری جانب نارووال سے (ن) لیگ کے رکن اسمبلی غیاث الدین نے بھی پرویزالٰہی کی حمایت کا اعلان کردیا۔

اس طرح اب ضمنی الیکشنز میں حمزہ شہباز کو اپنی وزارت اعلٰی برقرار رکھنے کے لیے 9 کے بجائے 11 نشستیں جیتنا ہوں گی۔

واضح رہے کہ پنجاب کے 20 حلقوں میں ضمنی انتخاب کیلئے پولنگ  کا آغاز ہوگیا  ہے ، انتخاب (ن) لیگ اور تحریک انصاف کی مقبولیت کا امتحان ہوگا۔