پنجاب  ضمنی انتخابات  :  پولنگ کا آغاز 

تفصیلات کے مطابق صوبائی دارالحکومت لاہور سمیت پنجاب کے 20 حلقوں میں پولنگ شروع ہو گئی ہے ۔ انتخابی عمل شام شام پانچ بجے تک جاری رہے گا۔

مسلم لیگ ن کو حمزہ شہباز کی وزارتِ اعلیٰ برقرار رکھنے کے لیے مزید 9 نشستوں کی ضرورت ہے، جبکہ پی ٹی آئی مزید 13 نشستوں کی خواہش مند ہے ۔

 20 صوبائی حلقوں میں 175 امیدواروں کے درمیان مقابلہ ہو رہا ہے ،  پی پی 7راولپنڈی ، پی پی83 خوشاب ، پی پی90 بھکر ، فیصل آباد کے حلقہ پی پی 97 ، جھنگ میں 125 ،127 اور شیخوپورہ میں پی پی 140 پر ضمنی انتخاب   ہورہے ہیں ۔ 

لاہور کی نشست پی پی 158، 167، 168 اور پی پی 170 پر ضمنی انتخاب  ہورہا ہے ۔

ساہیوال میں پی پی202 ، پی پی217 ملتان، لودھراں کے حلقہ پی پی 224 اور 228 پر ، بہاولنگر میں پی پی 237 اور مظفر گڑھ کے 3 حلقوں پی پی 237، 272، 273 پرضمنی انتخاب ہو رہا ہے ۔

لیہ کے حلقہ پی پی 282 اور ڈیرہ غازی خان  میں پی پی 288 پر بھی ضمنی انتخاب کیلئے پولنگ جاری ہے  ۔ 

20 حلقوں میں 45 لاکھ 79 ہزار 898 ووٹرز حقِ رائے دہی استعمال کر رہے ہیں، جن میں سے 24 لاکھ 60 ہزار 206 مرد ووٹرز ہیں، جبکہ 21 لاکھ 19 ہزار 692 خواتین ووٹرز ہیں۔

پولنگ اسٹیشنوں کی کل تعداد 3 ہزار 131 ہے، جن میں 676 انتہائی حساس، 1194 حساس اور 1271 نارمل پولنگ اسٹیشن ہیں۔ انتہائی حساس پولنگ اسٹیشنوں پر سی سی ٹی وی کیمرے نصب کیے گئے ہیں۔

تمام پولنگ اسٹیشنوں پر پولیس کے جوان تعینات ہیں، رینجرز حلقوں میں گشت کر رہی ہے، جبکہ آرمی اسٹینڈ بائی پوزیشن پر ہے۔

پولیس اور رینجرز کی نفری حساس اور انتہائی حساس پولنگ اسٹیشنوں پر ڈیوٹی سر انجام دے رہی ہے۔

الیکشن کمیشن نے پولنگ کے عمل کی نگرانی کے لیے کنٹرول روم قائم کر دیے ہیں۔ کنٹرول رومز میں پولنگ کے عمل کی نگرانی اور شکایات وصول کی جائیں گی۔

الیکشن کمیشن نے پولنگ ایجنٹس کو ہدایت کی ہے کہ وہ پریذائیڈنگ افسران سے دستخط شدہ فارم 45 اور فارم 46 کی کاپی لازمی حاصل کریں۔