اہلیہ اور بیٹی سے بہت ڈرتا ہوں ،خرچے کے پیسے بیوی سے مانگتا ہوں : خلیل الرحمٰن قمر

جی این این  کو خصوصی انٹرویو دیتے ہوئے ڈراما ساز خلیل الرحمٰن قمر  نے پہلی بار اپنی گھریلو زندگی سے متعلق بات کرتے ہوئے کہا کہ جب وہ کم عمر تھے تو انہیں ذوالفقار علی بھٹو پسند تھے اور ان کا لباس انہیں خصوصی طور پر پسند ہوتا تھا، ان کی خواہش ہوتی تھی کہ بھٹو جیسا کوٹ انہیں مل جائے تو ان کے مزے آجائیں۔

پروگرام میں بات کرتے ہوئے انہوں نے اپنی بیوی اور بیٹی کو بھی انٹرویو میں ساتھ بٹھایا اور گھریلو زندگی پر بھی بات کی اور بتایا کہ گھر میں ان کے بجائے ان کی اہلیہ کی حکمرانی چلتی ہے۔

خلیل الرحمٰن قمر کا کہنا ہے کہ وہ اپنی اہلیہ اور بیٹی سے بہت ڈرتے ہیںِ اور بیوی کے سامنے ان کی کوئی اوقات اور حیثیت نہیں ، وہ ان سے خرچے کے پیسے تک مانگتے ہیں۔ ان کے مطابق وہ کماتے ضرور ہیں مگر پیسے کا حساب کتاب ان کی اہلیہ رکھتی ہیں اور وہ ان سے اپنے اخراجات مانگتے ہیں۔

خلیل الرحمٰن قمر کی اہلیہ روبی خلیل نے دوران انٹرویو بات کرتے ہوئے بتایا کہ دونوں بینک میں ملازمت کرتے تھے اور بعد میں رشتہ آزدواج میں بندھ گے اور ان کی شادی کو 20 سال گزر چکے ہیں۔ خلیل الرحمٰن نے اس بات کا بھی ذکر کیا کہ ماضی میں ان پر اہلیہ کافی سختیاں کرتی تھی اور ان کے پاس کسی لڑکی کو گزرنے کی اجازت تک نہ ہوتی تھی مگر اب ایسا نہیں۔

پروگرام کے دوران خلیل الرحمٰن کی اکلوتی بیٹی نوشاب خلیل نے انکشاف کیا کہ والد لکھتے وقت روتے رہتے ہیں اور ٹشو پیپر ہر وقت اپنے ساتھ رکھتے ہیں اور کسی بھی خاتون کا کردار لکھنے کے بعد والد انہیں وہ کہانی سناتے ہیں۔