وزارت داخلہ نےسیلاب سے متاثرہ علاقوں میں فوج تعیناتی کی منظوری دے دی

وزارت داخلہ کے مطابق سول انتظامیہ کی مدد کے لیے چاروں صوبوں میں پاک فوج تعینات کرنے کی منظوری دی گئی ہے جبکہ اس ضمن میں آرٹیکل 245 کے تحت فوج تعیناتی کی سمری وفاقی کابینہ کو حتمی منظوری کے لیے بھجوا دی ہے۔

بتایا گیا ہے کہ چاروں صوبائی حکومتوں نےسیلاب سے متاثرہ علاقوں میں فوج کی تعیناتی کی ریکوزیشن بھجوائی جس کے تحت ریلیف اینڈ ریسکیو آپریشنز میں مدد کے لیے پاک افواج کی تعیناتی کی جا رہی ہے۔

اس حوالے سے وزیر داخلہ نے کہا کہ حکومت پنجاب نے ڈی جی خان میں سیلاب سے متاثرہ علاقوں اور خیبرپختونخوا حکومت نے ڈی آئی خان میں فوج تعیناتی کی ریکوزیشن کی ہے جبکہ بلوچستان کی صوبائی حکومت نے نصیرآباد، جھل مگسی، صحبت پور، جعفرآباد اورلسبیلہ میں فوج کی تعیناتی کیلئے ریکوزیشن کی ہے۔

خیال رہے کہ ملک بھر میں مون سون بارشوں کے بعد سیلابی ریلوں کی وجہ سے چاروں صوبے اس وقت بدترین حالات کا شکار ہے جبکہ مختلف واقعات میں 900 سے زائد افراد جاں بحق ہوچکے ہیں۔