آرمی چیف آج بلوچستان اور سندھ کے سیلاب متاثرہ علاقوں کا دورہ کرینگے 

پاک  فوج کے شعبہ تعلقات عامہ کے مطابق آرمی چیف جنرل قمر جاوید باجوہ آج بلوچستان اور سندھ کے سیلاب متاثرہ علاقوں کا دورہ کرینگے۔

آئی ایس پی آر کے مطابق  آرمی چیف جنرل قمر جاوید باجوہ کو سیلابی صورتحال اور امدادی کارروائیوں پر بریفنگ دی جائے گی۔

آئی ایس پی آر کا کہنا ہے کہ  آرمی چیف سیلاب متاثرہ علاقوں میں امدادی سرگرمیوں میں مصروف فوجی دستوں سے ملاقات کرینگے۔

دوسری جانب  سیلاب سے متاثرہ علاقوں میں پاک فوج کی امدادی کارروائیاں جاری ہیں ۔ پاک فوج صوبوں میں ریلیف کی کوششوں میں تعاون کر رہی ہے ۔  اس سلسلے میں راولپنڈی کے جنرل ہیڈ کوارٹرز (جی ایچ کیو) میں آرمی ایئر ڈیفنس کمانڈ ہیڈکوارٹرز میں آرمی فلڈ ریلیف سینٹر قائم کیا گیا ہے۔ 

پاک فوج کی  جانب سے لاہورڈویژن  میں 10، ملتان11 ،  گوجرانوالہ 17 اوربہاولپورمیں 7 کیمپ قائم کیے گئے ہیں جبکہ پنجاب رینجرزکا لاہور، سیالکوٹ، بہاولپور، منڈی بہاالدین ،  فیصل آباداورسرگودھا ڈویژن 6 اورجہلم میں3کیمپ قائم کیے گئے ہیں ،

خیبرپختونخوامیں ایبٹ آباداورمانسہرہ میں ریلیف کیمپ قائم کیے گئے ، بلوچستان میں41آرمی ریلیف کیمپ قائم کردیےگئے 

ایف سی بلوچستان  نارتھ کے14 اورایف سی بلوچستان ساؤتھ  میں 3ریلیف کیمپ قائم کیے گئے ہیں ۔

آئی ایس پی آر کے مطابق  ملک بھر میں اب تک ہزاروں فوجیوں کو متاثرہ علاقوں میں تعینات کیا گیا ہے جو ریلیف آپریشنز میں سرگرم ہیں، ان کے پاس 250 گاڑیاں، 50 کشتیاں موجود ہیں۔

آئی ایس پی آر کے مطابق وقتاً فوقتاً ایک سے زیادہ ہیلی کاپٹروں کو استعمال میں لایا جا رہا ہے ، لسبیلہ، اُتھل، آواران، غذر، جنوبی پنجاب، راجن پور اور ڈی جی خان کے کوہ سلیمان کے دور دراز علاقوں میں امدادی اشیاء کی تقسیم میں مدد کے علاوہ بڑی تعداد میں پھنسے ہوئے افراد کو بھی نکالا جا رہا ہے ۔  لسبیلہ، جھل مگسی، راجن پور، ڈی جی خان، دادو اور غذر کے آفت زدہ علاقوں سے 40000 سے زائد شہریوں کو محفوظ مقامات پر منتقل کیا گیا۔