سندھ، بلوچستان اورخیبرپختونخوا میں آج سے بارشوں کے نئے سلسلے کا آغاز 

تفصیلات کے مطابق سندھ، بلوچستان اور خیبر پختون خوا میں آج سے بارشوں کا نیا سلسلہ شروع ہوگا ۔ پہلے ہی بارشوں اور سیلاب سے متاثرہ علاقوں میں 14ستمبر تک وقفے وقفے سے بادل برسیں گے ۔

محکمہ موسمیات کے مطابق بدین، ٹھٹھہ اور میرپور خاص میں بادل برسیں گے۔ تھرپارکر، عمرکوٹ اور سانگھڑ میں بھی بارشوں کا امکان ہے۔

محکمہ موسمیات کاکہنا ہے کہ  13 اور 14 ستمبر کو لسبیلا، قلات اور خضدارمیں تیز ہواؤں اورگرج چمک کے ساتھ بارش کی پیشگوئی کی گئی ہے۔

14 ستمبر تک خیبرپختون خوا میں بھی بارشوں کا امکان ہے جبکہ سوات، مانسہرہ اور چارسدہ میں وقفے وقفے سے بارشیں ہوسکتی ہیں۔ پشاور، صوابی، چترال اور دیر میں بھی بادل برسیں گے، کشمیر اور گلگت بلتستان میں بھی بارشوں کی پیشگوئی کی گئی ہے۔

اسلام آباد، پنڈی اور لاہور سمیت پنجاب  میں بھی آج سے شروع ہونے والا بارشوں کا سلسلہ 14 ستمبر تک جاری رہے گا۔

 محکمہ موسمیات کے مطابق مری، اٹک، چکوال، جہلم اور سیالکوٹ ، نارووال، گوجرانوالہ، گجرات، شیخوپورہ، میانوالی میں بھی بارش ہوگی ۔

 خوشاب،سرگودھا، حافظ آباد، منڈی بہاؤالدین میں بھی بارشوں کی پیشگوئی کی گئی ہے۔

جھنگ اور فیصل آباد میں بھی آج سے 14ستمبر تک بادل برس سکتے ہیں ۔ 13 اور 14ستمبر کے دوران بھکر، لیہ، ڈی جی خان اور مظفرگڑھ میں وقفے وقفے سے بارشوں کی پیشگوئی کی گئی ہے۔