وزیراعظم کا سیلاب متاثرین کے 2 ماہ کے بجلی کے بل معاف کرنے کا اعلان

تفصیلات کے مطابق وزیراعظم محمد شہباز شریف نے سیلاب سے متاثرہ علاقوں کے 22 لاکھ گھریلو اور ساڑھے 3 لاکھ کمرشل صارفین کے بجلی کے ماہ اگست اورستمبرکے بل معاف کرنے کا اعلان کرتے ہوئے کہا  کہ ہم نے ملک کو ڈیفالٹ سے بچانے کےلئے مشکل فیصلے کرکے سیاست کی بجائے ہم نے ریاست بچائی ، 300 یونٹ تک بجلی کے دو کروڑ10 لاکھ صارفین کو ستمبرمیں بھی فیول پرائس ایڈجسٹمنٹ کی چھوٹ دیں گے۔

صحبت پور بلوچستا ن میں میڈیا سے بات چیت کرتے ہوئے وزیراعظم نے کہا کہ سیلاب سے صوبہ سندھ اور بلوچستان میں بڑے پیمانے پر تباہی ہوئی ، وفاقی حکومت کی جانب سے سیلاب متاثرین کےلئے 70 ارب روپے نقد رقوم کی صورت میں تقسیم کئے جارہے ہیں ،  اب تک 24 ارب روپے تقسیم ہوچکے ہیں ۔  بے نظیر انکم سپورٹ پروگرام کے تحت 25 ہزار روپے فی گھرانہ تقسیم کئے جارہے ہیں ، کچھ علاقوں میں انٹرنیٹ اوربجلی کا نظام درہم برہم ہونے سے اس رقم کی تقسیم میں تعطل ہے وہ بھی جلد دور کریں گے۔

انہوں نے کہا کہ متاثرہ علاقوں کے ہونہار بچوں کا تعلیمی خرچ نہیں ہونے دیں گے ۔ وفاقی اور صوبائی حکومتیں، قومی و صوبائی ادارے، انتظامیہ سب مل کر سیلاب سے متاثرہ علاقوں میں کام کررہے ہیں اس کی تباہی بہت زیادہ ہے تاہم انسانی حد تک جس قدر ممکن ہے متاثرین کی مدد کریں گے۔

وزیراعظم  نے متعلقہ حکام کو ہدایت کی کہ وہ متاثرہ علاقوں میں کھڑا پانی نکالنے کےلئے زیادہ مشینری لگائیں ، پینے کے پانی کی عدم دستیابی کا بڑا چیلنج ہے جس سے بیماریاں تیزی سے پھیل رہی ہیں ، این ڈی ایم اے نے پانی کے ٹینکوں کی فراہمی کےلئے اقدامات اٹھائے ہیں تاہم متاثرین کو منرل واٹر کی فراہمی یقینی بنائی جائے گی جس کے دو ٹرک آج جبکہ 10 ٹرک آئندہ2دنوں میں پہنچ جائیں گے ، پینے کے پانی کی فراہمی شاہراہوں کے ساتھ ساتھ ہیلی کاپٹر کے ذریعہ بھی ممکن بنائیں گے اس کےلئے جو بھی وسائل درکار ہوئے فراہم کریں گے ۔

 انہوں نے کہا کہ سیلاب سے متاثرہ علاقوں میں انفراسٹرکچر کی بحالی کا مرحلہ بھی آنا ہے، فصلوں کو پہنچنے والے نقصانات کے ازالے کےلئے صوبوں سے مل کر حکمت عملی بنائیں گے ۔