پیاز ٹماٹر فاسٹ ٹریک پر منگوانے کا فیصلہ،ذخیرہ اندوزوں کے خلاف کارروائی کی ہدایت

نیشنل فلڈ رسپانس کوآرڈینیشن سنٹر نے کھانے پینے کی اشیا بالخصوص پیاز اور ٹماٹر کو فاسٹ ٹریک پرمنگوانے کا فیصلہ کرتے ہوئے ہدایت کی ہے کہ سیلاب متاثرہ علاقوں میں غذائی اجناس کی کمی نہ ہونے دی جائے اور صوبے ذخیرہ اندوزی میں ملوث افراد کےخلاف قانونی کارروائی کریں۔

ڈپٹی چیئرمین احسن اقبال کی زیرصدارت نیشنل فلڈ رسپانس کوآرڈینیشن سینٹر کا اجلاس ہوا جس میں تمام چیف سیکریٹریز اور فیڈریٹنگ یونٹس نے شرکت کی،اجلاس میں فوڈ سیکیورٹی کا تفصیلی جائزہ لیا گیا۔

سیکرٹری وزارت خوراک نے بریفنگ میں بتایا کہ پیاز اور ٹماٹر مہیا کرنے کے لیے ہنگامی سطح پراقدامات کیے جا رہے ہیں،اس وقت غذائی اجناس کا اسٹاک کافی تعداد میں موجود ہے،اگلی فصل کی کاشت سے پہلے تک بروقت اقدامات کر لیے جائیں تو غذائی قلت نہیں ہو گی۔

سیکرٹری وزارت خوراک نے بتایا کہ متعلقہ حکام کو ہدایت کی گئی کہ گندم، چاول، دالیں اور دیگر ضروری اشیا کی فراہمی کو یقینی بنایا جائے،یہ اجناس متاثرہ علاقوں میں بھی پہنچانے کے اقدامات کیے جائیں گے۔