وزیردفاع کا پی ٹی آئی لانگ مارچ پرفائرنگ واقعہ کی شفاف تحقیقات پرزور

تفصیلات کے مطابق وزیر دفاع خواجہ محمد آصف نے تحریک انصاف کے لانگ مارچ میں فائرنگ کے واقعہ کی شفاف تحقیقات پر زور دیا ہے تاکہ اس جرم کے حقیقی ذمہ داروں کو بے نقاب کیا جا سکے۔ 

قومی اسمبلی میں اظہار خیال کرتے ہوئے  خواجہ محمد آصف  نے کہا کہ ملک میں سیاست میں پرتشدد رویوں اورعدم برداشت کے بڑھتے ہوئے رجحان کی مذمت کی جانی چاہیے۔

وفاقی وزیر نے کہاکہ بدقسمتی ہے کہ بعض سیاستدانوں نے جارحانہ زبان استعمال کی جس سے ان کے پیروکار سیاسی حریفوں کے خلاف تشدد پراترآئے ہیں۔ انہوں نے  زخمیوں کی جلد صحت یابی کی دعا کی ،

انہوں نے کہاکہ ذاتی مفاد کیلئے سیاست کو استعمال کرنے کے رجحان سے گریز کرنا چاہیے تاکہ معاشرے میں راوداری کو فروغ دیاجاسکے ،سیاست مذاکرات اورمسائل پرامن طریقے سے حل کرنے کا نام ہے۔

بی این پی کے سربراہ اختر جان مینگل نے کہا سیاست میں تشدد قابل مذمت ہے ، انہوں نے کہاکہ جمہوری معاشرے میں تشدد کی کوئی گنجائش نہیں ہوتی ۔

جماعت اسلامی کے رہنما مولانا عبدالاکبر چترالی نے کہاکہ سیاست دانوں کو اپنی انا بالائے طاق رکھتے ہوئے مذاکرات کے میز پر بیٹھنا چاہیے تاکہ معاشرے میں رواداری کو فروغ دیاجاسکے۔

ایوان کا اجلاس کورم پورا نہ ہونے کی وجہ سے کل صبح گیارہ بجے تک ملتوی کردیاگیا۔