عمران خان کا آج شام قوم سے خطاب کا امکان

سابق وزیراعظم عمران خان کا آج شام 4 بجے عوام سے خطاب کا امکان ہے۔میڈیا رپورٹس کے مطابق عمران خان  عوام سے خطاب میں خود پر ہونے والے قاتلانہ حملے سے متعلق گفتگو کریں گے اور لانگ مارچ کے حوالے سے آئندہ کا لائحہ عمل بھی بتائیں گے۔

عمران خان نے پارٹی قیادت کا اجلاس بھی طلب کر رکھا ہے۔پی ٹی آئی رہنما فیصل جاوید نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ عمران خان آج دوپہر ایک بجے پارٹی اجلاس کی صدارت کریں گے جس میں آئندہ کا لائحہ عمل طے کیا جائے گا۔ 

میڈیکل بورڈ نے عمران خان کی میڈیکل رپورٹس کو تسلی بخش قرار دے دیا۔ڈاکٹرز نے عمران خان کو چہل قدمی کی اجازت دے دی۔سابق وزیر اعظم عمران خان ہسپتال سے آج ہی ڈسچارج کرنے پر بضد ہیں،جبکہ ڈاکٹرز نے عمران خان کو ایک روز آرام کا مشورہ دیا ہے۔

ہسپتال انتظامیہ کے مطابق عمران خان کے مزید ٹیسٹ کرنے کی ضرورت نہیں۔ میڈیا رپورٹس کے مطابق سابق وزیراعظم عمران خان کی ٹانگ کی ہڈی میں کوئی نقصان نہیں ہوا،آپریشن کے دوران ہر قسم کے ذرات نکال دئیے گئے۔

عمران خان کی ٹانگ کا آپریشن کیا گیا ہے،ان کی ٹانگ کی ہڈی میں کوئی نقصان نہیں ہوا۔ہسپتال انتظامیہ نے کہا کہ آپریشن کے دوران ہر زاویے سے تسلی کرنا ضروری تھا۔

گزشتہ رات پی ٹی آئی رہنما فیصل جاوید نے بھی بتایا تھا کہ اب سے کچھ دیر پہلے عمران خان صاحب سے ملاقات ہوئی!الحمدللہ ان کا آپریشن ہو گیا اور وہ اللہ کے فضل سے تندرست ہیں۔ فیصل جاوید نے مزید کہا کہ ان کے جذبے کو سلام ہے،

انھوں نے کہا کہ وہ آخری سانس تک اس قوم کے لئے اپنی جدوجہد جاری رکھیں گے۔پوری قوم کی دعاؤں کا شکریہ،جبکہ قاتلانہ حملےکے بعد عمران خان کا برطانیہ میں اپنے بچوں سے ٹیلیفون پر رابطہ ہوا۔

ذرائع کے مطابق عمران خان کے بیٹوں نے ان کی خیریت دریافت کی جب کہ عمران خان نے اپنے بچوں کو حوصلہ دیا۔