وفاقی حکومت سیاسی انتقام میں اندھی ہو چکی ہے،پنجاب میں شب خون مارنے کی سازش ناکام ہوگی: عمران خان

وزیراعلیٰ پنجاب چودھری پرویز الٰہی  اور رکن قومی اسمبلی حسین الٰہی سے ملاقات کے دوران عمران خان نے موجودہ ملکی خصوصاً صوبائی سیاست اور اعتماد کے ووٹ کے حوالے سے مشاورت کی۔

عمران خان کا کہنا تھا کہ فرحان خان کو انڈین ایجنٹ سمجھ کر الٹا کر سارا جسم زخمی کیا گیا۔ ایک محب وطن پاکستانی کا قصور کیا ہے۔ پوری قوم کے لیے سوالیہ نشان ہے۔ انہوں نے پرویز الٰہی کے اہل خانہ کو نو فلائی لسٹ میں شامل کرنے کے اقدام کی مذمت کرتے ہوئے کہا کہ وفاقی حکومت سیاسی انتقام میں اندھی ہو چکی ہے۔

سابق وزیراعظم کا کہنا تھا کہ امپورٹڈ حکومت نے آئین و قانون کی دھجیاں اڑا دی ہیں۔ پنجاب میں وفاقی حکومت کی شب خون مارنے کی سازش ناکام ہو گی۔ پی ٹی آئی اور ق لیگ کے اراکین اسمبلی متحد ہیں اور وفاقی وزرا کو منہ کی کھانا پڑے گی۔ سیاست میں کبھی انتقامی کارروائی کی اور نہ یقین رکھتے ہیں۔

اس موقع پر وزیراعلیٰ پنجاب چودھری پرویز الٰہی کا کہنا تھا کہ چاہے فرحان خان پر تشدد کی بات ہو یا بندے اٹھانے کی، شہبازشریف اور رانا ثنا کی ہر سازش ناکام ہو گی۔ ان شا اللہ ناکامیاں شہباز شریف اور رانا ثنا کا مقدر بن چکی ہیں۔ انہوں نے کہا کہ وفاقی حکومت اقتدار کے لالچ میں بدترین انتقامی کارروائیاں کر رہی ہے۔