حکومت اور اپوزیشن کے درمیان مذاکرات کےلئے رابطہ

سپریم کورٹ کے حکم پرحکومت اور تحریک انصاف کے درمیان مذاکرات آج شام 6 بجے پارلیمنٹ ہاؤس میں ہوںگے۔

ذرائع کے مطابق  چیئرمین سینیٹ نے حکومت اور تحریک انصاف کو آج ہی مذکرات کی دعوت دے دی،مذاکرات کےلیے شام چھ بجے کا وقت تجویز کیا گیا ہے۔

حکومتی ذرائع کا کہنا ہے کہ اٹارنی جنرل منصور عثمان اعوان اور وزیرِ اعظم شہباز شریف کے درمیان ملاقات کے بعد وفاقی وزیرِقانون اعظم نذیر تارڑ اور پی ٹی آئی رہنما بیرسٹر علی ظفر کے درمیان بھی رابطہ ہوا ہے۔

 چیئرمین سینیٹ صادق سنجرانی نے بات چیت کے لیے تحریک انصاف کے رہنماؤں سے 5 نام مانگ لیے تھے۔چیئرمین سینیٹ صادق سنجرانی نے اس مقصد کیلئے پاکستان تحریک انصاف کے رہنماؤں شاہ محمود قریشی، اسد عمر اور شہزاد وسیم سے رابطہ کیا تھا۔جس پرعمران خان نے حکومت کے ساتھ مذاکرات کیلئے شاہ محمود قریشی، فواد چوہدری اور سینیٹر علی ظفر پر مشتمل تین رکنی کمیٹی بنا دی تھی۔

دوسری جانب وزیراعظم شہباز شریف کی ہدایت پر وزیر قانون سینیٹر اعظم نزیر تارڑ کا پی ٹی آئی راہنما سینیٹر علی ظفر ایڈووکیٹ سے رابطہ کیا ہے،حکمران جماعتوں کے اندر الیکشن کے معاملے پر سفارشات کی تیاری کے لئے کمیٹی کے ارکان کے ناموں پر آج غور ہوگا۔

وزیراعظم کی طرف سے آج قومی اسمبلی کے ارکان کے اعزاز میں ظہرانہ کے بعد حکمران جماعتوں کی داخلی کمیٹی کے ارکان کے ناموں کو حتمی شکل دینے پر غور ہوگا،یہ کمیٹی حکمران جماعتوں کے سربراہی اجلاس میں بنانے کا فیصلہ ہوا تھا،حکمران اتحاد نے انتخابات کے لئے پہلے سے جاری مشاورتی عمل کو اگلے مرحلے میں لیجانے کے لئے کمیٹی تشکیل دی ہے۔