شہباز شریف کی محسن نقوی کی رہائش گاہ آمد،خیریت دریافت کی،صحت یابی کے لیے نیک خواہشات کا اظہار

اسلام آباد: وزیر اعظم محمد شہباز شریف وفاقی وزیر داخلہ محسن نقوی کی رہائش گاہ پہنچے جہاں انہوں نے ان کی خیریت دریافت کی اور صحت یابی کے لیے نیک خواہشات کا اظہار کیا۔

تفصیلات کے مطابق ملاقات کے دوران ملک کی داخلی سیکیورٹی اور مجموعی صورتحال پر تبادلہ خیال کیا گیا۔ وفاقی وزیر داخلہ محسن نقوی نے وزیر اعظم کو امن و امان برقرار رکھنے کے لیے کیے گئے اقدامات سے آگاہ کیا۔

انہوں نے بریفنگ میں بتایا کہ پولیس سمیت قانون نافذ کرنے والے اداروں کو واضح ہدایات جاری کر دی گئی ہیں اور وہ خود سیکیورٹی انتظامات کی ذاتی طور پر مانیٹرنگ کر رہے ہیں۔

وزیر اعظم شہباز شریف نے داخلی سلامتی کے لیے کیے گئے اقدامات پر اطمینان کا اظہار کرتے ہوئے ہدایت کی کہ عوام کی جان و مال کے تحفظ کے لیے کوئی کسر نہ اٹھا رکھی جائے۔

محسن نقوی نے بتایاکہ پولیس سمیت قانون نافذ کرنے والے  تمام اداروں کو اس ضمن میں واضح ہدایات جاری کر دی ہیں۔ محسن نقوی  نے بتایا کہ میں ذاتی طور پر سکیورٹی انتظامات کی مانیٹرنگ کر رہا ہوں۔ 

وزیر داخلہ کی ہدایت پر آج وزیر مملکت برائے داخلہ طلال چوہدری نے خود اسلام آباد کے ریڈ زون کا دورہ کیا اور نماز جمعہ سے پہلے تمام علاقوں کی سکیورتی کے انتظامات کا خود جائزہ لیا۔

واضح رہے کہ محسن نقوی گزشتہ اتوار اسلام آباد میں مظاہرین سے بات چیت کے دوران زخمی ہو گئے تھے۔