آج اہم فیصلے کا دن ہے،14 مئی کو انتخابات کرانے کا فیصلہ برقرار رہے گا یا نہیں؟

تفصیلات کے مطابق سپریم کورٹ کا پنجاب میں 14 مئی کو انتخابات کرانے کا فیصلہ برقرار رہے گا یا نہیں؟؟ فیصلے کا دن آ پہنچا۔الیکشن کمیشن کی نظرثانی درخواست پر سماعت چیف جسٹس عمر عطا بندیال کی سربراہی میں تین رکنی بینچ آج کرے گا۔

سپریم کورٹ رولز کے تحت نظرثانی درخواست فیصلہ سنانے والا بینچ ہی سنتا ہے ۔

دلچسپ امریہ ہے کہ 14 مئی کو انتخابات کے فیصلے پردائر ہونے والی نظرثانی درخواست پر سماعت 15 مئی یعنی اس وقت ہوگی جب اس پر عملدرآمد بھی ممکن نہیں ہوگا۔ عدالتی رولز کے مطابق نظرثانی درخواست کا دائرہ کارمحدود ہونے کی وجہ سے منظوری کے امکانات کم جبکہ خارج ہونے کے زیادہ ہیں۔

درخواست کی منظوری کی صورت میں حکومت پر فنڈز اور سکیورٹی کی عدم فراہمی پر توہین عدالت کی لٹکتی تلوار ہٹ جائے گی۔ درخواست خارج ہوئی تو بھی وقت گزرنے کی وجہ سے انتخابات گزشتہ تاریخ پر نہیں ہوسکیں گے۔

خیال رہے کہ سپریم کورٹ نے 4 اپریل کو اسپیکر پنجاب اسمبلی کی درخواست پر صوبے میں 14 مئی کو انتخابات کرانے کا حکم دیا تھا جس پر الیکشن کمیشن نے نظرثانی درخواست دائر کررکھی ہے۔

واضح رہے کہ انتخابات ایک ساتھ کرانے کے کیس میں چیف جسٹس آبزرویشن دے چکے ہیں کہ الیکشن کمیشن کی درخواست قابل سماعت نہیں کیونکہ کمیشن نے وسائل ملنے پرانتخابات کیلئے آمادگی ظاہرکی تھی۔

یاد رہے کہ الیکشن کمیشن آف پاکستان کی نظرثانی درخواست میں موقف اختیار کیا گیا ہے کہ سپریم کورٹ کوالیکشن کی تاریخ دینے کا اختیارہی نہیں ہے۔

دوسری جانب کل ہی پاکستان تحریک انصاف کے چیئرمین عمران خان کی القادر ترسٹ کیس میں رہائی سے متعلق عدالتی فیصلے پرسپریم کورٹ آف پاکستان کے باہرپی ڈی ایم نے احتجاج کا اعلان کررکھا ہے، اورحوالے پی ڈی ایم شامل جماعتوں کے قافلے اسلام آباد پہنچ رہے ہیں۔