بین الاقوامی برادری نسل پرستی کو ختم کرنے کے لئے اقدامات کرے، سیکرٹری جنرل اقوام متحدہ

اقوام متحدہ: اقوام متحدہ کے سیکرٹری جنرل انتونیو گوتریس نے بین الاقوامی برادری پر زور دیا کہ وہ نسل پرستی کی لعنت کو ختم کرنے کے لیے اقدامات کرے۔

چینی خبررساں ادارے کے مطابق انتونیو گوتریس نے افریقی نسل کے لوگوں کے لیے اقوام متحدہ کے ایک فورم سے خطاب کرتے ہوئے کہا کہ افریقی باشندوں نے دنیا کے کونے کونے میں معاشروں کو تقویت بخشی ہے اور انسانی کوششوں کے ہر شعبے میں بہت زیادہ تعاون کیا ہے اور پھر بھی ہم اس بات سے آگاہ ہیں کہ افریقی نسل کے لوگوں کو بدستور نسلی امتیاز کا سامنا ہے۔

انہوں نے کہا کہ صدیوں کی غلامی اور نوآبادیاتی استحصال کا طویل سایہ آج بھی دور حاضر کو جھنجھوڑ رہا ہے۔ ہمیں اپنے معاشروں کو نسلی امتیاز کی لعنت سے چھٹکارا دلانے کے لیے زیادہ عجلت کے ساتھ کام کرنا چاہیے، اور افریقی نسل کے لوگوں کی مکمل سیاسی، معاشی اور سماجی شمولیت کو بغیر کسی امتیاز کے مساوی شہری کے طور پر یقینی بنانا چاہیے۔