وزارت مذہبی امور نے پاکستانی عازمین حج کی مدد اور سہولت کے لئے منیٰ میں مین کنٹرول آفس قائم کر دیا

منی ؍مکہ المکرمہ۔26جون (اے پی پی):وزارت مذہبی امور نے پاکستانی عازمین حج کی مدد اور سہولت کے لئے منیٰ میں مین کنٹرول آفس (ایم سی او) قائم کر دیا ہے۔ ترجمان وزارت مذہبی امور کے مطابق کنٹرول روم میں معلومات اور رابطے کو یقینی بنانے کے لیے ایک انفارمیشن سیل قائم کیا گیا ہے۔

ایک خصوصی سیل بھی قائم کیا گیا ہے تاکہ کسی بھی گمشدہ حاجی یاسامان کی تلاش میں مدد دی جا سکے۔ پرائیویٹ حجاج کے کسی بھی ممکنہ مسائل کی کڑی نگرانی اور ان کے حل کے لیے مانیٹرنگ سیل قائم کیا گیا ہے۔

مختلف دیگر خصوصی یونٹس، جیسے کہ وہیل چیئر ڈیسک وغیرہ حاجیوں کی سہولت کے لیے قائم کیے گئے ہیں۔ ان سہولیات کی فراہمی کا مقصد قیام حج کے انتظامات کو بہتر بنانا ہے اور ان سے تمام پاکستانی عازمین کے لیے آرام دہ اور پریشانی سے پاک ماحول فراہم کرنے کے لیے وزارت مذہبی امور کے عزم کی عکاسی ہوتی ہے۔