دوسرا ٹیسٹ ، پاکستان نے 510 رنز بنا کر پہلی اننگز ڈیکلیئر کردی

پاکستان اور زمبابوے کے درمیان کھیلے جانیوالے دوسرے ٹیسٹ میچ میں پاکستان نے  8 وکٹوں پر 510  رنز بنا کر پہلی اننگز ڈیکلیئر کر دی ہے۔ دوسرے ٹیسٹ کے دوسرے روز پاکستانی بلے باز عابد علی نے شاندار بیٹنگ کا مظاہرہ کرتے ہوئے ٹیسٹ کیریئر کی پہلی ڈبل سینچری بنا کر شاندار اعزاز اپنے نام کر لیا۔ عابد علی نے کمال بیٹنگ کا مظاہرہ کرتے ہوئے 27 چوکوں کی مدد سے ڈبل سینچری اسکور کی۔ عابد علی ہرارے میں ڈبل سینچری بنانے والے پاکستان کے دوسرے اور دنیا کے پانچویں بلے باز بن گئے ہیں، اس سے قبل یونس خان نے ہرارے میں 2013 میں ڈبل سینچری اسکور کی تھی۔

پاکستان کی طرف سے اظہر علی نے 126 رنز سکور کیے اور  نعمان علی 97 رنز پر آؤٹ ہو گئے۔

زمبابوے کے موزاربانی 3 شکار کر کے نمایاں رہے ہیں ۔

اس سے قبل  پاکستان  نے ٹاس جیت کر پہلے بیٹنگ کا فیصلہ کیا تھا،اوپنر  عمران بٹ دو رنز بنا کر12 کے مجموعے پر تریپانو کی گیند پر کیچ آؤٹ ہو گئے تھے۔ جس  کے بعد اظہر علی اور عابد علی کے ساتھ مل کر بہترین کھیل پیش کیا۔

اظہر علی نے 126 رنز کی شاندار اننگ کھیلی،   ان کے بعد بابراعظم صرف دو رنز بنانے میں ہی کامیاب ہوئے۔ فواد عالم 5 اور ساجد خان 20 رنز بنانے میں کامیاب ہوئے تھے۔

واضح رہے کہ  پاکستان نے زمبابوے کوپہلے ٹیسٹ میں ایک اننگرز اور 116 رنز سے شکست دیدی تھی، زمبابوے کی ٹیم دوسری اننگز میں 134 رنز بنا کر آؤٹ ہو گئی تھی۔ پاکستان کی جانب سے حسن علی 5  وکٹیں لے کر سرفہرست رہے تھے ۔ حسن علی کو میچ میں 9 وکٹیں حاصل کرنے پر مین آف دی میچ کا ایوارڈ دیا گیا تھا۔