پاک فضائیہ کے دستے کی فضائی مشق برائٹ سٹار 2023 میں کامیاب شرکت کے بعد وطن واپسی،ترجمان پاک فضائیہ

اسلام آباد: مصر میں منعقدہ بحری، بری اور فضائی افواج پر مشتمل بین الاقوامی فضائی مشق برائٹ اسٹار 2023 میں حصہ لینے والے پاک فضائیہ کے دستے نے مشق میں کامیاب شرکت کے بعد وطن واپسی پر ایک آپریشنل ایئر بیس پر لینڈنگ کی ہے۔ مشق کی بدولت اس میں شامل دنیا بھر سے کل 30 ممالک کی مسلح افواج کے مابین باہمی تعاون اور پیشہ ورانہ صلاحیتوں کو فروغ حاصل ہوا۔

ترجمان پاک فضائیہ کی جانب سے اتوار کو جاری پریس ریلیز کے مطابق مشق میں حصہ لینے والے پاک فضائیہ کے دستے میں شامل پیشہ ورانہ مہارت کے حامل لڑاکا پائلٹس، ماہر ایئر ڈیفینس کنٹرولرز اور تجربہ کار تکنیکی گراؤنڈ عملے نے شاندار کارکردگی کا مظاہرہ پیش کیا۔ پاک فضائیہ کے دستے نے فضائی مشق میں انتہائی فخر اور پیشہ ورانہ مہارت کے ساتھ جدید جےایف-17 تھنڈر لڑاکا طیاروں کو ایک بہترین ٹیم ورک کا مظاہرہ کرتے ہوئے آپریٹ کیا۔

برائٹ سٹار مشق کا بنیادی مقصد باہمی تعاون کو فروغ دیتے ہوئے شریک ممالک کے مابین تربیتی شعبے میں باہمی اشتراک کو تقویت دینا تھا۔ مشق کے دوران، پاک فضائیہ کے ایئر و گراؤنڈ عملے نے پے در پے غیر معمولی فضائی عسکری صلاحیتوں کا مظاہرہ کرتے ہوئے پاکستان کے سب سے بہترین فضائی اثاثے، جے۔ایف 17 تھنڈر لڑاکا طیارے کی بہترین خصوصیات کو انتہائی مؤثر انداز سے اجاگر کیا۔