وزیراعلیٰ پنجاب کی تربت میں ایف سی اہلکاروں پر دہشتگرد حملے کی مذمت

تفصیلات کے مطابق وزیراعلیٰ عثمان بزدار نے ایک بیان میں  شہدا کے اہل خانہ سے دلی ہمدردی اور اظہار تعزیت کیا۔ان کا کہنا تھا کہ بہادر سپوتوں نے اپنے قیمتی لہو سے وطن عزیز میں امن کی آبیاری کی، شہداء کی لازوال قربانیوں کو قوم سلام پیش کرتی ہے۔انہوں نے کہا کہ مٹھی بھر دہشت گرد قوم کے پختہ عزم کو متزلزل نہیں کر سکتے، قوم دہشت گردی کے ناسور کے مکمل خاتمے کے لیے یک جان ہے۔ وزیراعلی عثمان بزدار نے  زخمی اہلکاروں کی جلد صحت یابی کے لئے دعا  بھی کی ۔

واضح رہےکہ  گزشتہ روز کوئٹہ اور تربت میں دہشتگردوں کیساتھ جھڑپ میں فرینٹئیر کور (ایف سی) کے 3 سپاہی وطن پر قربان جبکہ 5 زخمی ہو گئے  تھے ۔پاک فوج کے شعبہ تعلقات عامہ (آئی ایس پی آر) کے مطابق کوئٹہ کے علاقہ مرگرٹ میں دہشتگردوں نے سیکیورٹی پر مامور ایف سی جوانوں پر حملہ کیا، فائرنگ کے تبادلے میں ایف سی کے تین جوان شہید جبکہ ایک زخمی ہوا۔آئی ایس پی آر کے مطابق دوسرے واقعے میں دہشتگردوں نے پاک ایران سرحد پر گشت کرنے والے جوانوں پر حملہ کیا۔ اس حملے میں چار ایف سی جوان زخمی ہوئے۔ شہید ہونے والوں میں لانس نائیک سید حسین شاہ، سپاہی فیصل محمود، سپاہی نعمان الرحمان شامل ہیں۔