عدالتی حکم کے باوجود شیریں مزاری کی گرفتاری پر توہین عدالت کیس

اسلام آباد ہائیکورٹ میں عدالتی حکم کے باوجود شیریں مزاری کی گرفتاری کے خلاف توہین عدالت کیس میں ملوث پولیس اہلکاروں کیخلاف کارروائی کا حکم دے دیا گیا۔ اسلام آباد ہائیکورٹ کے جسٹس میاں گل حسن اورنگزیب نے شیریں مزاری کی گرفتاری سے متعلق توہین عدالت کیس کی سماعت کی۔

جسٹس گل حسن اورنگزیب نے ریمارکس دیے کہ شیریں مزاری کی گرفتاری سے روک رکھا تھا، ہمارے آرڈرکی جب خلاف ورزی ہوتو ہمارے لئے بڑا مشکل ہوتا ہے۔ بادی النظرمیں اس عدالت کی خلاف ورزی ہوئی ،اگرعدالت کاروائی سے مطمئن نہ ہوئی تو اسے مزید آگے بڑھائیں گے۔

آئی جی اسلام آباد ڈاکٹر اکبر ناصر عدالت میں پیش ہوئے اور موقف پیش کیا کہ ملوث اہلکاروں کیخلاف کارروائی جاری ہے۔

عدالت نے آئی جی اسلام آباد کوملوث پولیس اہلکاروں کیخلاف کاروائی کا حکم دیتے ہوئے ایک ماہ میں رپورٹ جمع کرانے کا حکم دے دیا۔

جسٹس میاں گل حسن اورنگزیب نے ریمارکس دیے کہ جوپولیس اہلکارعدالتی حکم کی خلاف ورزی میں ملوث ہیں ان کیخلاف کارروائی کی جائے۔