وزیر اعظم کا شہباز شریف کے حوالے سے ایف آئی اے کو متحرک کرنے کا فیصلہ

وزیراعظم کی زیر صدارت اجلاس کی اندرونی کہانی سامنے آگئی۔اس اجلاس میں اٹارنی جنرل ،شہزاد اکبر ،فواد چودھری اور علی ظفر شریک تھے۔ وزیر اعظم نے کہا کہ  شہباز شریف کسی طور باہر نہیں جانا چاہیے۔

ذرائع کے مطابق  شہباز شریف کے حوالے سے شہزاد اکبر کو نیا ٹاسک بھی سونپ دیا گیا ہے، شہباز شریف کے حوالے سے ایف آئی اے کو متحرک کرنے کا فیصلہ بھی کرلیا گیا۔شہزاد اکبر کو فوری طور پر لاہور ہائی کورٹ میں اپیل دائر کرنے کی ہدایت کردی گئی۔

وزیر اعظم نے کہا کہ ایف آئی اے ہی حدیبیہ پیپر ملز کیس کے حوالے سے کام کرے۔وزیراعظم عمران خان نے عید کے بعد شہزاد اکبر سے حدیبیہ کیس پر ورکنگ کر کے رپورٹ پیش کرنےکاحکم دیدیا۔

اس سے قبل   حکومت نے  حدیبیہ پیپر ملز کیس کی از سر نو تفتیش کا فیصلہ کیا تھا۔سماجی رابطے کی ویب سائٹ ٹوئٹر پر ایک ٹویٹ میں وفاقی وزیر اطلاعات فواد چوہدری کا کہنا تھا کہ  آج وزیر اعظم عمران خان کو قانونی ٹیم نے شہباز شریف کے مقدمات کے حوالے سے تفصیلی بریفنگ دی، حکومت نے یہ فیصلہ کیا ہے کہ حدیبیہ پیپر ملز کا مقدمہ نئے سرے سے تفتیش کا متقاضی ہے اور اس سلسلے میں متعلقہ اداروں کو تفتیش نئے سرے سے شروع کرنے کی بدایات دی جارہی ہیں۔

وزیر اطلاعات  فواد چوہدری نے مزید کہا کہ  حدیبیہ کا مقدمہ شریف خاندان کی کرپشن کا سب سے اہم سرا ہے، اس مقدمے میں شہباز شریف اور نواز شریف مرکزی ملزم کی حیثئیت رکھتے ہیں، جو طریقہ حدیبیہ میں پیسے باہر بھیجنے کیلئے استعمال ہوا اسی کو بعد میں ہر کیس میں اپنایا گیا۔  اس لئے اس کیس کو انجام تک پہنچانا از حد اہم ہے۔