تمام سیاسی جماعتوں کو انتخابی عمل میں یکساں مواقع فراہم کیے جائیں، صدر مملکت

 صدر مملکت ڈاکٹر عارف علوی نے کہا ہے کہ آئندہ عام انتخابات آزادانہ، منصفانہ، شفاف اور جامع ہونے چاہئیں، ملک میں جمہوریت کو مستحکم کرنے کے لیے تمام سیاسی جماعتوں اور ان کی قیادت کو انتخابی عمل میں حصہ لینے کے یکساں مواقع فراہم کیے جائیں،

صدر مملکت نے سابق وفاقی وزیر اور سینیٹر محمد علی درانی سے ملاقات کے دوران گفتگو کرتے ہوئے کہا کہ اگر لوگ اپنی پسند کے لیڈر منتخب نہ کر سکیں تو جمہوریت بے معنی ہو جاتی ہے۔ معیشت سمیت تمام ممکنہ محاذوں پر مشکلات کا مقابلہ کرنے کے لیے ملک میں سیاسی، ادارہ جاتی اور دیگر سٹیک ہولڈرز کے اتحاد کی اشد ضرورت ہے۔

انہوں نے کہا کہ تلخیاں ختم ہونی چاہئیں اور تعاون اور درگزر کا راستہ نکلنا چاہیے۔ مشکل فیصلوں کے لیے عوام کی حمایت اور ان کی شراکت داری درکار ہوتی ہے۔ آئندہ عام انتخابات ہمارے ملک کی تعمیرنو کے لیے ضروری تحریک پیدا کرنے کا ایک اچھا موقع ہیں۔

صدر مملکت نے تمام سیاسی رہنمائوں کی طرف سے دیئے گئے بیانات کو بھی سراہا کہ ایک برابری کا میدان ہونا چاہیے کیونکہ شمولیت کا یہ اہم اور واحد معاملہ جمہوریت کی روح ہے