شہزادہ فیصل بن فرحان کی ماسکو میں لاوروف سے ملاقات، فلسطین پر دوٹوک مؤقف

 سعودی عرب کے وزیر خارجہ شہزادہ فیصل بن فرحان نے دورہ روس کے دوران ماسکو میں اپنے روسی ہم منصب سرگئی لاوروف سے ملاقات کی، جس میں دو طرفہ تعلقات اور خطے کی صورتحال پر تبادلہ خیال کیا گیا۔

ملاقات کے بعد میڈیا سے گفتگو میں جب سعودی وزیر خارجہ سے اسرائیل کے ساتھ تعلقات کو معمول پر لانے کے امکانات سے متعلق سوال کیا گیا تو ان کا کہنا تھا کہ "ہماری موجودہ ترجیح غزہ میں مستقل جنگ بندی ہے۔" ان کا کہنا تھا کہ سعودی عرب مسئلہ فلسطین کے پائیدار حل اور انسانی جانوں کے تحفظ کو اولین حیثیت دیتا ہے۔

دوسری جانب، سعودی وزیر دفاع شہزادہ خالد بن سلمان نے واشنگٹن میں وائٹ ہاؤس کا دورہ کیا، جہاں ان کی امریکی صدر ڈونلڈ ٹرمپ سے ایک اہم ملاقات ہوئی۔

امریکی میڈیا رپورٹس کے مطابق یہ ملاقات خفیہ نوعیت کی تھی، جس میں ایران کے ساتھ بڑھتی ہوئی کشیدگی کو کم کرنے کے حوالے سے مختلف پہلوؤں پر تبادلہ خیال کیا گیا۔ ملاقات کے بعد شہزادہ خالد بن سلمان نے ایران کے چیف آف اسٹاف سے ٹیلی فون پر رابطہ بھی کیا، جو خطے میں کشیدگی میں کمی کے لیے ایک اہم پیش رفت تصور کی جا رہی ہے۔