عمران خان سے اڈیالہ جیل میں ان کی قانونی ٹیم اور ذاتی معالج کی ملاقات

اڈیالہ جیل میں چیئرمین پی ٹی آئی کی قانونی ٹیم  اور ان کے ذاتی معالج سے ملاقات ہوئی ہے۔ جس کے بعد ان کے وکلاء نے بتایا ہے کہ سابق وزیراعظم سپریم کورٹ کے کل کے فیصلے سے مطمئن ہیں اور الیکشن سپریم کورٹ کی زیرنگرانی بروقت چاہتے ہیں۔

چیئرمین پی ٹی آئی عمران خان  کے ذاتی معالج نے نے بھی ان سے اڈیالہ جیل میں تفصیلی ملاقات کی ہے۔ جس کے بعد انہوں نے میڈیا کو سابق وزیراعظم کی صحت کے متعلق آگاہ کیا ہے۔

چئیرمین پی ٹی آئی کے ذاتی معالج چیف میڈیکل آفیسر شوکت خانم ہسپتال ڈاکٹرعثمان یوسف نے میڈیا سے گفتگو کی ہے۔ ان کا کہنا تھا کہ عمران خان سے ملاقات کرکے بہت خوشی ہوئی ان کی صحت پہلے سے بہتر لگی ہے۔ وہ جسمانی اور ذہنی طور پر تندرست ہیں۔ 

انہوں نے بتایا کہ گزشتہ سال جب سے ان کو گولی لگی تھی اس کے بعد وہ ورزش کم کررہے تھے جس سے ان کا وزن بڑھ گیا تھا۔ مجھے اجازت دی گئی چیئرمین پی ٹی آئی کے مکمل چیک اپ کی۔ میں نے خود ان کو چیک کیا ہے مجھے ان کی صحت بہتر لگی ہے۔

انہوں نے مزید کہا کہ چیئرمین پی ٹی آئی کا بلڈ پریشر، پلس اور چھاتی کا معائنہ کیا ہے۔ چیئرمین پی ٹی آئی کو ہاضمے کا تھوڑا مسئلہ ہے وہ پہلے بھی کبھی کبار ہوتا تھا۔ ہاضمے کیلئے ان کو ایک ٹیسٹ اور میڈیسن تجویز کی ہے۔

بیرسٹر علی ظفر نے میڈیا سے گفتگو میں کہا کہ چیئرمین پی ٹی آئی کی صحت بلکل ٹھیک ہے۔ ڈاکٹر عثمان یوسف نے بھی چیک کیا۔ چیئرمین پی ٹی آئی نے ایک ہی پیغام دیا ہے کہ ملک اس وقت معاشی بحران کا شکار ہے ملک کو اس وقت ایک پاپولر لیڈر کی ضرورت ہے۔ جو کہ صرف انتخابات کے ذریعے آسکتا ہے۔

انہوں نے بتایا کہ چیئرمین پی ٹی آئی نے کہا ہے کہ نوے دن میں انتخابات کے حوالے سے جو پٹیشن عدالت میں ہے اس کو سماعت کیلئے مقرر کیا جائے۔ الیکشن وقت پر ہوں اور سپریم کورٹ کی سپرویژن میں فری اینڈ فئیر ہوں، الیکشن کمیشن نے تو الیکشن نہیں کرائے اب ساری نظریں سپریم کورٹ پر ہیں۔ 

بیرسٹر علی ظفر نے بتایا کہ چئیرمین پی ٹی آئی کل کے فیصلے میں خصوصی طور اس بات پر مطمئن ہیں کہ ماضی کے کیسز نہیں کھلیں گے۔ انہوں نے کہا اپیل کا حق ہونا چاہئیے یہ درست فیصلہ ہے۔